Sumqayıt İnformasiya Texnologiyaları Akademiyası (SİTA) tərəfindən həyata keçirilən “Səsin gəlsin!” podkast layihəsi çərçivəsində müsabiqə elan edilib.
Müsabiqədə podkast (mütəmadi olaraq səs və ya video formatında hazırlanan və internetdə yerləşdirilərək yayımlanan media fayllar) hazırlaya bilən 17-29 yaş arası podkastçılar, jurnalistlər, jurnalistika fakültələrinin tələbələri, bloqçular iştirak edə bilərlər.
Oktyabrın sonunadək keçirilən müsabiqənin şərtləri “podkast.az”saytında yerləşdirilib. İştirak etmək istəyənlər hazırladıqları podkastları müsabiqənin şərtlərini oxuduqdan sonra saytda qeydiyyatdan keçərək yerləşdirə bilərlər.
“Səsin Gəlsin!” podkast layihəsinin əsas məqsədi Bakı və Sumqayıt şəhərlərində Azərbaycanda podkast mədəniyyətini formalaşdırmaqdan ibarətdir.
SİTA podkast avadanlığı olmayan, lakin müsabiqəyə qatılmaq istəyən gəncləri şəxsiyyəti təsdiq edən sənəd qarşılığında podkast avadanlığı ilə təmin edir. Avadanlıq podkastçıya 2 gün ərzində qaytarmaq şərti ilə verilir.
