E - HÖKUMƏT

Məlumat verdiyimiz kimi, ötən günlərdə İnformasiya Texnologiyalarının İnkişafı Dövlət Fondunun Müşahidə Şurasının növbəti iclası keçirilib.

Rabitə və Yüksək Texnologiyalar nazirinin müavini Elmir Vəlizadənin sədrliyi ilə baş tutmuş tədbirdə “İnformasiya Texnologiyalarının İnkişafı Dövlət Fondunun vəsaitinin istifadəsi qaydaları”na təklif olunan dəyişikliklər müzakirə edilib, Fondun elan etdiyi 1-ci qrant müsabiqəsində qalib gələn layihələrin yekunları barədə təqdimatlar keçirilib.
Həmçinin, Fondun Müşahidə Şurası 3-cü qrant müsabiqəsinin elan olunma tarixi və mövzusu barədə qərar qəbul edib.

Xeberler.az-ın məlumatına görə, artıq 3-cü qrant müsabiqəsində innovativ və tətbiqi elmi-texniki İKT layihələrinin hansı prioritet istiqamətləri üzrə qəbul olunacağı açıqlanıb. Həmin istiqamətləri sizə təqdim edirik:

1. Mütərəqqi proqram təminatının hazırlanması;
2. İnnovativ İKT məhsulları nümunələrinin hazırlanması;
3. İnnovativ infrastrukturun inkişafı, o cümlədən yeni texnologiyaların inkişafı və onların kommersiyalaşdırılması;
4. Müasir texnologiyalar əsasında informasiya şəbəkələrinin yaradılması;
5. İKT xidmətlərinin genişləndirilməsi, o cümlədən internet xidmətlərinin inkişafı.

Qeyd edək ki, 3-cü qrant müsabiqəsi çərçivəsində layihələrin qəbulu 2 oktyabr 2015-ci il tarixdən 2 noyabr 2015-ci il tarixədək davam edəcək. 3-cü qrant müsabiqəsində yalnız Azərbaycan Respublikasının vətəndaşı olan fiziki şəxslər iştirak edə bilərlər.

Fonddan Xeberler.az-a bildirilib ki, 3-cü qrant müsabiqəsində innovativ və tətbiqi elmi-texniki İKT layihələrinin hansı prioritet istiqamətləri üzrə qəbul olunacağı ilə bağlı Fondun rəsmi qərarı və ətraflı məlumat günün ikinci yarısı yayımlanacaq. 

Məltəm Talıbzadə