AZNET

ABŞ Prezidenti Donald Trampın Amerika iqtisadiyyatının yavaşlaya biləcəyi barədə bəyanatlarından sonra “NASDAQ 100” texnologiya indeksinin səhmləri 1 trilyon dollar kapitallaşma itirib.

Xeberler.az məlumat verir ki, bu barədə “Bloomberg” bildirib.

Martın 9-da “Fox News” efirində Tramp idxal mallarına rüsumların artırılmasının Amerika iqtisadiyyatına təsir edə biləcəyini etiraf etsə də, mümkün resessiya haqqında sualdan yayınıb.

“Nasdaq 100” indeksi təxminən 4 % azalıb ki, bu da 2022-ci ildən bəri ən pis göstəricidir. Bakı vaxtı ilə 22:13-ə olan vəziyyətə görə, ən çox zərər çəkmiş “Tesla” olub: elektromobil istehsalçısının indeksi 14 % azalıb. Proqram təminatı tərtibatçısı “Palantir Technologies”in səhmləri 11 %, “Apple” şirkətinin qiymətli kağızları 5,3 %, “Microsoft” 3,5 %, “Nvidia” isə 4,8 % azalıb.

Son bir ayda ABŞ-nin aparıcı indeksləri təxminən 5 % azalıb, Amerika şirkətlərinin bazar kapitallaşmasını 3,4 trilyon dollar azaldıb.

Xatırladaq ki, Donald Tramp seçkiqabağı kampaniyası zamanı prezidentliyi dövründə ABŞ-nin “Qızıl dövr”ə qədəm qoyacağını vəd etmişdi. Martın 5-də Konqres qarşısında “Ölkənin vəziyyəti haqqında” müraciətlə çıxış edən Tramp bu tezisi təkrarlayaraq Amerika “Qızıl dövrünün yenicə başladığını” söyləmişdi.