İNNOVASİYA VƏ STARTAP

AMEA YT Parkda hazırda dünyada tanınan "Rainergy" layihəsinin müəllifi, gənc ixtiraçı Reyhan Camalova ilə görüş keçirilib.

Bu barədə Xeberler.az-a AMEA-dan məlumat verilib.

Bildirib ki, AMEA YT Parkın Biznes İnkubasiya Mərkəzinə qəbul edilən "Rainergy" layihəsinin həyata keçirilməsi, ixtira olunan qurğunun təkmilləşdirilməsi üçün texnoparkda gənc startapçı üçün lazımi şərait yaradılacaq.

Startapçı Reyhan Camalova ixtirası haqqında ətraflı məlumat verib.

Yağış suyundan enerji istehsalını nəzərdə tutan "Rainergy" qurğusu dörd əsas hissədən: yağış suyunun kollektoru, su çəni, elektrik generatoru və batareyadan ibarətdir. Yağış suyu kollektoru su çənini yağış suyu ilə doldurur, su isə elektrik generatorunun içi ilə böyük sürətlə axaraq elektrik enerjisi yaradır. İstehsal olunan enerji akkumulyatorlarda toplanır, elektrik şəbəkəsinin xətlərinə düşən təzyiqi azaldır və ehtiyacı olan icmalara elektrikdən istifadə etmək üçün əlavə mənbə verir. Qurğunun prototipi hazırda 22 led lampanı işıqlandırır. Bu da təqribi 22 watt enerji deməkdir. Reyhan Camalovanın layihəsi alternativ enerji mənbələrinin dünyada aktuallaşdığı dövrdə, xüsusilə yağıntıların çox olduğu Hindistan, İndoneziya kimi ölkələr üçün əlverişlidir.

15 yaşlı gənc ixtiraçı Reyhan Camalovanın ixtirası noyabrda Hindistanda keçirilən Qlobal Sahibkarlıq Forumunda böyük marağa səbəb olub. Amerika Birləşmiş Ştatları Prezidentinin baş müşaviri və ölkə başçısının qızı İvanka Trump  xüsusi diqqətini çəkib. 

 Xeberler.az