"Nəhayət ki, SİMA Dövlət Vergi Xidmətinin fərdi sahibkarlar üçün nəzərdə tutulan xidmətlərinə
inteqrasiya olunub. Yəni bundan sonra sahibkarlar
new.e-taxes.gov.az portalında elektron qaiməni, vergi bəyannamələrini SİMA rəqəmsal imza ilə rahatlıqla təqdim edə biləcəklər. 6 ay müddətində tətbiqdən abunə haqqı ödəmədən istifadə etmək imkanı da yaradılıb".
Xeberler.az bildirir ki, bu sözləri Azərbaycan İnternet Formunun Prezidenti, ekspert Osman Gündüz deyib.
Ekspert bildirib ki, indiyədək yalnız xarici şirkətə (Best Solutions) məxsus identifikasiya vasitəsi olan “ASAN imza” ilə bu xidmətləri əldə etmək olardı:
"Hazırda təxminən 1 milyonadək aktiv "Asan imza" istifadəçisi var. Yəni Best Solitions şirkəti hər ay 2 milyondan manatdan çox bu resursdan gəlir götürür. Yəni yetərincə gəlirli bir sektorda- identifikasiya bazarında indiyədək rəqabətli bir mühit yox idi.
Xatırladıram ki, SİMA-nın DVX-yə inteqrasiyası 2 il çəkib. Bu haqda çox yazılıb. Hiss olunurdu ki, inteqrasiyada maraqlı olmayanlar da var. Maraqlı olmayanlar da sektorda hamıya məlum idi.
Son zamanlar DVX-nin rəqəmsal transformasiyasına xeyli vəsaitlər yatırılıb, AVİS sisteminin söykəndiyyi İT infrastruktur xeyli inkişaf etdirilib. Bir müddət öncə DVX mobil tətbiq də istifadəyə verib".
Osman Gündüzün sözlərinə görə, yenicə AZCON Holdinqin tərkibinə qatılan AzİnTelecom da biometriyaya əsaslanan SİMA rəqəmsal imza infrastrukturunu xeyli genişləndirib:
"SİMA-nın populyar və ictimai əhəmiyyət kəsb edən biznes xidmətlərinə inteqrasiyası sahəsində, Azərbaycanın imza bazarında rəqabətli mühitin formalaşması sahəsində DVX və AzİnTelecom-un səyləri təqdirə layiqdir.
Bütün bunlar ölkədə əlverişli biznes mühitinin yaradılması baxımından da mühüm əhəmiyyət kəsb edir.
Düşünmək olar ki, bununla da adında ASAN sözü olmasına baxmayaraq ASAN Xidmətə dəxli olmayan, xarici şirkətə məxsus identifikasiya vasitəsinin- ASAN imza-nın inhisarçılığına son qoyuldu.
Lakin nəzərə almaq lazımdır ki SİMA–nın hələlik hüquqi şəxslər və dövlət qurumları üçün inteqrasiyası başa çatmayıb".
Ekspert ümid edir ki, SİMA-nın dövlət sektoruna, biznes mühitinə inteqrasiyanı də tezliklə başa çatdırarlar:
"Yeri gəlmişkən, həm də ümid edirəm ki, sahibkarlar üçün güzəşt müddəti başa çatdıqdan sonra SİMA rəqəmsal xidmətindən istifadə üçün tariflər də əlçatan olacaq".
