QANUNVERİCİLİK

Azərbaycan Prezidenti İlham Əliyev “Azərbaycan Nəqliyyat və Kommunikasiya Holdinqinin (AZCON) yaradılması və bununla əlaqədar bəzi məsələlərin həll edilməsi haqqında” 2024-cü il 7 noyabr tarixli Fərmanın icrası ilə əlaqədar bir sıra normativ hüquqi aktlara dəyişikliklər edilməsi barədə Fərman imzalayıb.

Dəyişikliklərə əsasən, müxtəlif fərman və sərəncamlarda Rəqəmsal İnkişaf və Nəqliyyat Nazirliyinin (RİNN) səlahiyyətlərinin bir hissəsi AZCON-un idarəetməsinə verilmiş qurumlarla əlaqədar yenilənib.

Fərmana əsasən:

• 2019-cu il 17 yanvar tarixli Fərmanda bəzi müddəalar ləğv edilib və maliyyələşdirmə ilə bağlı müddəalara dəyişiklik olunub.
• Xüsusi dövlət rabitəsi ilə təmin olunan vəzifəli şəxslərin siyahısına "Aztelekom" MMC-nin baş direktoru və "Azərpoçt" MMC İdarə Heyətinin sədri daxil edilib.
• Baş Dövlət Yol Polisi İdarəsinin mərkəzi informasiya sistemi haqqında Əsasnamədə RİNN-in tabeliyindəki qurumlar ifadəsi AZCON-un idarəetməsinə verilmiş qurumlar kimi əvəz olunub.
• "Azərbaycan Respublikasının 2022–2026-cı illərdə sosial-iqtisadi inkişaf Strategiyası", "Böyük Qayıdışa dair I Dövlət Proqramı", "Naxçıvan Muxtar Respublikasının sosial-iqtisadi inkişafına dair 2023–2027-ci illər üçün Dövlət Proqramı" və "Su ehtiyatlarından səmərəli istifadəyə dair Milli Strategiya" sənədlərində AZCON yeni icraçı qurum kimi əlavə olunub və ya RİNN-in yerini tutub.
• Həmçinin həmin dövlət proqramlarının akronimlər və ixtisarlar bölmələrinə AZCON – Azərbaycan Nəqliyyat və Kommunikasiya Holdinqi əlavə edilib.

Qəbul edilən dəyişikliklər AZCON-un yaradılmasından sonra nəqliyyat və kommunikasiya sahəsində idarəetmə strukturunun yeni modelə uyğunlaşdırılmasına, dövlət proqramları və strateji sənədlərdə holdinqin səlahiyyətlərinin hüquqi cəhətdən təsbit edilməsinə xidmət edir.