Azərbaycan nümayəndəsi rabitə ilə bağlı Daşkənddə keçirilən tədbirlərdə iştirak edib
AzərTAc-ın xüsusi müxbiri xəbər verir ki, Daşkənddə Regional Rabitə Birliyi (RRB) Elektrik Rabitə Operatorları Şurasının 23-cü, RRB-nin Elektrik Rabitə Komissiyasının 19-cu iclasları və “Naqilsiz rabitə sistemi tətbiqinin hüquqi, texniki və iqtisadi tərəfləri” mövzusunda seminar keçirilmişdir.
Rabitə və İnformasiya Texnologiyaları Nazirliyi “Aztelekom” İstehsalat Birliyinin baş mütəxəssisi Məzahir Vəliyevin də iştirak etdiyi tədbirlərdə Türkiyə, Rusiya, Qazaxıstan, Qırğızıstan, Moldova, Tacikistan və Özbəkistanın rabitə sahəsinin mütəxəssisləri ənənəvi və naqilsiz rabitənin inkişafı məsələlərini müzakirə etmişlər.
Azərbaycan nümayəndəsi iclaslarda və seminardakı çıxışlarında bu sahələrdə “Aztelekom”un gördüyü işlər haqqında geniş məlumat vermişdir. Məzahir Vəliyev demişdir ki, İstehsalat Birliyi əhalisi az olan yaşayış məntəqələrinin telefonlaşdırılması ilə bağlı üzərinə götürdüyü öhdəliyi vaxtından xeyli tez - Azərbaycanda prezident seçkilərinədək yerinə yetirmiş, 595 yaşayış məntəqəsi telefonlaşdırılmışdır.
