TƏDBİRLƏR

Təhsil Nazirliyinin dəstəyilə “Microsoft Azərbaycan” şirkəti Azərbaycanda növbəti “İnnovativ Müəllimlər” müsabiqəsini elan edib.

Ümumdünya İnnovativ Müəllimlər Forumunun Azərbaycan mərhələsi olan bu müsabiqə ölkəmizdə Təhsil nazirliyinin Microsoft korporasiyası ilə birgə həyata keçirilən “Təhsildə əməkdaşlıq” proqramının tərkib hissəsidir.

Müsabiqə MƏDƏD humanitar təşkilatı, ULTRA, HP şirkətləri və İntelin “Gələcək üçün təhsil” proqramı, AZEDUNET və British Council təşkilatları tərəfindən dəstəklənir. 

Müsabiqənin məqsədi Azərbaycanın təhsil sistemində çalışan innovativ orta məktəb müəllimlərinin şəbəkəsini yaratmaq, onların informasiya texnologiyalardan istifadəsini təkmilləşdirmək və şagirdləri XXI əsr biliklərinə yiyələnməsi üçün şərait yaratmaqdır. Müsabiqə “məzmunda innovasiya” nominasiyası üzrə keçirilir.

“Məzmunda innovasiya” nominasiyası innovasiya yanaşmasının və informasiya texnologiyalarının yardımılə məktəbin dərs proqramını daha səmərəli şəkildə tədris etməyə imkan verən ən yaxşı təhsil layihələrinin müəyyən edilməsinə istiqamətlənir.
 
Müsabiqədə iştirak şərtləri:
• İştirakçının orta məktəb müəllimi olması;
• İştirakçının Layihə metodikası biliklərinə malik olması;
• İnformasiya texnologiyalarınan istifadə olunması;
• Müsabiqəyə təqdim olunan layihələrin şagirdlərlə tətbiqi və şagird işlərinin olması;
• Layihə planının təqdim olunması.

Müsabiqə iki mərhələdən ibarət olacaq. İlkin mərhələdə hər bir iştirakçı peşəkar jürinin qiymətləndirəcəyi layihənin təsvirini təqdim etməlidir. İkinci mərhələdə finalçılar öz layihələrinin təqdimatlarını keçirəcəklər. Finalçılar arasında müsabiqənin qalibləri həm pedaqoji, həm də valideyn jürisi tərəfindən müəyyənləşdiriləcək. Müsabiqənin yekunlarına görə müvafiq olaraq birinci, ikinci və üçüncü yerləri tutan qaliblər müəyyənləşəcək. Layihələrin qəbulu 15 avqust tarixində başa çatacaq.

Müsabiqənin Azərbaycan üzrə qalibi ölkəmizi noyabrda Braziliyada keçirilən Ümumdünya İnnovativ Müəllimlər Forumunda təmsil edəcəkdir.

Qeyd edək ki, Azərbaycan müəllimləri bu ilin martında ilk dəfə olaraq Avropa İnnovativ Müəllimlər Forumunda ölkəmizi təmsil etmiş və müsabiqənin yekunlarına görə ilk onluğa daxil olmuşlar.

Müsabiqədə iştirak etmək üçün http://itn-az.spaces.live.com saytındakı anketi və layihə planını doldurmaq və [email protected] ünvanına göndərmək lazımdır.