Bakı metrosunda Wi-Fi olacaqmı?

08-09-2015 / 11:54

“Bakı metrosunda Wi-Fi olmayacaq və hazırda bu məsələ heç müzakirə də olunmur”.

Son dövrlərdə Azərbaycanda informasiya cəmiyyətinin formalaşması sürətlənib, informasiya texnologiyaları xeyli inkişaf edib. Mobil telefon daşıyıcılarının sayı artıb. Dövlət qurumları və şirkətlər tərəfindən xeyli sayda xidmətlər elektron formada təqdim olunur. Belə olan təqdirdə insanların bu xidmətlərə əlçatımlığının artmasına ciddi ehtiyac var.  Bu məqsədlə yalnış iş yerlərində deyil, eyni zamanda ictimai əhəmiyyət kəsb edən yerlərdə, insanların daha çox olduğu yerlərdə- parklarda, bulvarda, o cümlədən sərnişin nəqliyyatında da Wi-Fi şəbəkəsinin olmasına ciddi ehtiyac yaranıb. Son dövrlərdə  bu tip bir sıra yerlərdə , o cümlədən universitet şəhərciklərində pulsuz Wi-Fi şəbəkəsi quraşdırılıb.
 Amma insanların daha çox istifadə etdiyi ictimai nəqliyyatda, xüsusən metroda Wi-Fi şəbəkəsi hələlik quraşdırılmayıb.

Məsələylə bağlı “Bakı Metropoliteni” QSC-nin Mətbuat xidməti və ictimaiyyətlə əlaqələr şöbəsinin rəisi Nəsimi Paşayev Xeberler.az-a bildirib ki, metroda Wi-Fi olmayacaq və hazırda bu məsələ heç müzakirə də olunmur. Metropoliten rəsmisi  qeyd edib ki, indiki halda heç bir metro stansiyamızda Wi-Fi şəbəkəsinin qurulmasından söhbət belə getmir: “Yaxın gələcəkdə deyə bilmərəm, amma hazırda metroda Wi-Fi şəbəkəsinin qurulması ilə bağlı məsələ aktual deyil”.

Azərbaycan İnternet Forumunun prezidenti Osman Gündüz hesab edir ki, metroda, digər ictimai nəqliyyat növlərində, insanların daha çox toplaşdığı yerlərdə  Wi-Fi şəbəkəsinin olması çox vacibdir. Belə ki, indiki dövrdə insanlar problemlərini qısa müddətdə, çevik və effektiv, rahat formada  həll etmək istəyirlər. Həm də axı elektron hökumət quruculuğundan da faydalanmaq lazımdır. Əgər bu tip əlçatımlıq olarsa, insanlar elektron xidmətlərdən də faydalana bilərdilər. Osman Gündüz nəinki dünya ölkələrində, eləcə də qonşu  ölkələrdə artıq bu tip məsələlərin, həm də buradakı təhlükəsizlik məsələlərinin də öz həllini tapdığını da diqqətə çatdırıb.

O vurğulayıb ki, Bakı Metropoliteni internet provayderlərlə, mobil operatorlarla əlaqəyə girərək qarşılıqlı əməkdaşlıq əsasında bu problemi həll edə bilərlər: “Qonşu ölkələrin bir neçəsində artıq metro stansiyalarında Wi-Fi şəbəkəsi qurulub. Nəinki ictimai nəqliyyat, hətta vətəndaşların daha çox gəzinti məqsədilə  istifadə etdikləri küçə və prospektlər, ictimai əhəmiyyətli yerlər Wi-Fi-la təmin olunub”.

Osman Gündüz Azərbaycanda da insanların ictimai informasiyalardan, elektron xidmətlərdən daha effektiv istifadəsi üçün münbit şərait yaradılmasının faydalı olacağını bildirib.

 

Mirvari Nəcəf


ŞƏRHLƏR





sorğu
Delta Telecom şirkətinin son istifadəçiyə birbaşa internet xidməti göstərməsi internet bazarında vəziyyəti necə dəyişə bilər ?
  • “Çəkidə aldatma” aradan qalxacaq və internetin keyfiyyəti yüksələcək.
  • İnternet bazarında sərbəst və azad rəqabət güclənəcək.
  • Qiymətlər enəcək və daha sürətli internetdən istifadə edənlərin sayı kəskin artacaq
  • İnternet bazarında rəqabət azalacaq.