TƏHLÜKƏSİZLİK

Xeberler.az bildirir ki, Bakı Nəqliyyat Agentliyi sərnişinlərin isti hava şəraitində dayanacaqlarda gözləməsini nəzərə alaraq, onlara su paylanılması prosesini təşkil edib.

Belə ki, paytaxtın müxtəlif metrostansiyalarının ətrafında və Koroğlu Nəqliyyatı Mübadilə Mərkəzində vətəndaşlara xidmət göstərilir.

Həmçinin Bakı Nəqliyyat Agentliyinin (BNA) mətbuat katibi Mais Ağayev vəziyyətlə bağlı məlumat verib: "Bir daha bəyan edirik ki, sərnişinlərimizin rahatlığı Bakı Nəqliyyat Agentliyinin önəm verdiyi məsələlərdəndir və bunun üçün zəruri olan tədbirlər görülməkdədir."

O, qeyd edib ki, adi günlərdən fərqli olaraq sərnişinlərin daşınması yalnız müntəzəm marşrut avtobusları ilə həyata keçirildiyindən müəyyən çətinliklər müşahidə edilir:

"Buna baxmayaraq Bakı Nəqliyyat Agentliyinin göstərişi ilə bütün ehtiyat avtobuslar sərnişindaşıma prosesinə cəlb edilir. Sərnişinlərimizdən yaranmış müvəqqəti narahatlığı nəzərə almalarını xahiş edirik".

Eyni zamanda Mais Ağayev daşıyıcılara müəyyən göstərişlər verib:

“Həmçinin, qəti şəkildə daşıyıcılara tapşırılıb ki, xüsusi rejim davam etdiyi müddətdə sərnişindaşıma ödənişsiz həyata keçirilsin. Bildiririk ki, bu və xüsusi rejimlə bağlı digər tapşırıqları yerinə yetirməyən, sosial məsuliyyətini deyil, yalnız qazanc əldə etmək maraqlarını güdən hüquqi və fiziki şəxslər barəsində ciddi tədbir görüləcək”.

Qeyd edək ki, o,  sosial şəbəkələrdən və KİV-dən daxil olan bütün müraciətlər qeydə alındığını və vəziyyət normallaşdıqdan sonra zəruri tədbirlərin görüləcəyini bildirib.

Sevinc Baba-zadə