«APA-Economics»in məlumatına görə, forumda çıxış edən BP-nin Azərbaycan, Gürcüstan və Türkiyə üzrə regional prezidenti Qordon Birrell bildirib ki, forum çərçivəsində BP mütəxəssisləri dünyada, o cümlədən Azərbaycanda neft-qaz hasilatı üçün nəzərdə tutulan yeni texnologiyalar üzrə təqdimat və müzakirələr aparacaqlar. O bildirib ki, BP hər il dünyada kəşfiyyat işləri və texnologiyaların təkmilləşdirilməsinə 500 mln. ABŞ dolları həcmində vəsait xərcləyir ki, bunun da təxminən 10%-i Azərbaycanın payına düşür.
Regional prezidentin sözlərinə görə, BP-nin yeni texnologiyalarının çox hissəsi artıq Azərbaycanda müvəffəqiyyətlə tətbiq edilir: «BP şirkəti Azərbaycanda texnologiyalara investisiyanın qoyulması sahəsinə böyük diqqətlə yanaşır».
Forumda çıxış edən ARDNŞ-in birinci vitse-prezidenti Xoşbəxt Yusifzadə neft-qaz hasilatı sahəsində yeni texnologiyaların vacibliyini qeyd edərək tədbirin bu sahədə mühüm rol oynayacağını bildirib. BP-nin və ARDNŞ-in mütəxəssislərinin iştirakı ilə keçirilən forum 4 gün davam edəcək.
