E - HÖKUMƏT

Neçə vaxtdır fəaliyyətində qeyri-müəyyən səbəblərdən problemlər yaranan CATEL mobil rabitə şirkəti bağlanıb. Azərbaycanın rabitə və informasiya texnologiyaları naziri Əli Abbasov jurnalistlərə deyib ki, şirkətin fəaliyyətində texniki problemlər yaranıb.

CATEL şirkəti texniki problemləri mayın əvvəlinədək aradan qaldıracağını açıqlasa da, bu, mümkün olmayıb: “Məsələyə nazirlik müdaxilə etməli olub. Hazırda CATEL-in stasionar rabitəni ”Bakıtelefonrabitə" İstehsalat Birliyi, mobil rabitəni isə “Azerfon” şirkəti öz üzərinə götürmək istiqamətində iş aparır. Yaxın vaxtlarda CATEL abunəçiləri bu problemin aradan qaldırılmasının şahidi olacaqlar".
Xatırladaq ki, bu il aprelin əvvəllərindən başlayaraq CATEL şəbəkəsində problem yaranıb, abonentlər şəbəkədən ayrılıb, şirkət bunu texniki nasazlıqla izah edib. Lakin mətbuata çatan xəbərlərdə deyilir ki, əslində şirkətin üzləşdiyi problemlər texniki deyil, CATEL-in rabitə xidmətləri göstərməsinə hökumət mane olur və şirkətin rabitə şəbəkəsində bilərəkdən bu cür texniki əngəllər törədilir. Bunun səbəbləri ilə bağlı müxtəlif versiyalar irəli sürülüb, şirkətin yüksək rütbəli hansısa məmura bağlı olduğu barədə məlumatlar yayılıb.
CATEL Azərbaycanda "Bakcell" və "Azərcell"dən sonra fəaliyyətə başlayan üçüncü mobil rabitə operatorudur. Şirkət əsasən CDMA standartları əsasında stasionar rabitə xidməti göstərirdi və 70 minə yaxın abonenti var idi. “Caspian American Telecom LLC” adı altında Azərbaycanda qeydiyyatdan keçən bu şirkət əslində Amerika telekommunikasiya şirkəti ilə ortaq qurulub. Onun mülkiyyətçiləri Azərbaycan hökuməti və ABŞ-ın “Omni Communications” konsorsiumudur. “Omni Communications” baş ofisi ABŞ-ın Virciniya ştatında yerləşən şirkətdir və Azərbaycanda telekommunikasiya bazarında mövqelərini möhkəmləndirməyə cəhd edirdi. Şirkət Azərbaycanda rabitə şəbəkəsinin qurulmasına 25 milyon dollar investisiya yatırıb. Azərbaycanın ABŞ-la münasibətlərinin gərgin olduğu indiki vaxtda CATEL-in bu cür problemlə üzləşməsi və daha sonra bağlanması, onun qurduğu rabitə şəbəkəsinin “Bakıtelefonrabitə” və hakimiyyətə bağlı “Azerfon”a verilməsinin arxasında siyasi səbəblərin olduğu istisna deyil. Mümkündür ki, Azərbaycan hakimiyyəti münasibətlərin belə pis olduğu bir vaxtda Amerika şirkətinin ölkənin telekommunikasiya sektorunda fəaliyyətində hansısa risklər görüb.
Dünən günün sonunda məlumat aldıq ki, CATEL Azərbaycanın Rabitə və İnformasiya Texnologiyaları Nazirliyini məhkəməyə verib. Səbəb kimi bu şirkətə yaradılan süni problemlər və CATEL-in hakimiyyətin nəzarətinə verilməsi göstərilir. Xəbər redaksiyamıza iş gününün sonunda daxil olduğundan xəbəri aidiyyəti ünvanlarla dəqiqləşdirmək imkanımız olmadı. Mövzunu davam etdirəcəyik

//Yeni Müsavat