PROQRAMLAR

Azərbaycan gözəl ölkə, Bakı gözəl şəhərdir. Forumun burada keçirilməsi sevindiricidir.

Xeberler.az məlumat verir ki, bu sözləri “Statistikanın inkişaf perspektivləri: beynəlxalq layihələrin rolu” mövzusunda Bakıda keçirilən III Beynəlxalq Statistika Forumunda çıxış edən MDB İcraiyyə Komitəsi sədrinin müavini Denis Trefilov deyib.

O bildirib ki, Azərbaycan statistikası MDB dövlətləri arasında inkişaf edərək müasirləşib.

“Azərbaycanda statistik hesablamalar zamanı İT vasitələri tətbiq edilir ki, bu da məlumatların dəqiqliyini təmin edir. Statistik təhlillər zamanı məlumatların dəqiqliyi olduqca zəruridir. Dəqiq məlumatlar əsasında dövlətlər arasındakı iqtisadi münasibətlər də tənzimlənir. MDB daxilində qarşılıqlı faydalı əməkdaşlıq əlaqələrinin daha da artması qurum üzvlərinin iqtisadi inkişafına da müsbət təsir göstərir. Yeni rəqəmsal dünyada statistika aparıcı rola malikdir. Bu gün rəqəmsal transformasiya həyatın demək olar ki, bütün sahələrini əhatə edir. Buna görə də perspektivlərimiz bu yeni şəraitə uyğunlaşmaqda, innovasiyaları tətbiq etməkdə, iqtisadiyyatın yeni sahələri və sosial hadisələr üçün metodologiya inkişaf etdirməkdə, təbii ki, rəqəmsal texnologiyaların bütün imkanlarından və ən yaxşı təcrübələrindən istifadə edərək yeni göstəricilər işləyib hazırlamaqda görünür”, - deyə D.Trefiov nəzərə çatdırıb.

O bildirib ki, MDB ölkələri üçün valyutaların alıcılıq qabiliyyəti pariteti əsasında beynəlxalq müqayisələrin qlobal proqramı, beynəlxalq statistik layihələrdə fəal iştirak qarşılıqlı inteqrasiyanı dərinləşdirmək və iqtisadi əlaqələri gücləndirmək üçün güclü vasitədir: “Bu layihələrdə nəzərdə tutulan məlumatların toplanması və emalına vahid yanaşmalar ölkələrimizi müqayisəli təhlil etməyə, sosial-iqtisadi inkişafda oxşar və fərqli tendensiyaları müəyyən etməyə, milli və beynəlxalq səviyyədə həyata keçirilən siyasi tədbirlərin və proqramların effektivliyini qiymətləndirməyə imkan verir. Beləliklə, biz etibarlı, təsdiqlənmiş və ən əsası, obyektiv məlumatlar əsasında qərarlar qəbul etmək imkanı əldə edirik”.

D.Trefilov MDB-nin platformasında statistika forumunun təkcə birlik ölkələrinin deyil, həm də digər dövlətlərin və beynəlxalq təşkilatların nümayəndələrini birləşdirən xoş ənənəyə çevrildiyini diqqətə çatdırıb.