"Şübhələnmək üçün əsaslar var ki, Birbanka girişin məhdudlaşması problemi məhz ötən ilin sonunda elan olunan rebrendinqlə bağlı olub".
Xeberler.az bildirir ki, bu sözləri Azərbaycan İnternet Formunun Prezidenti, ekspert Osman Gündüz deyib.
Ekspertin sözlərinə görə, ötən ilin sonu Kapital Bank rəhbərliyi 2025-il, yanvarın 15-dən Kapital Bank brendinin Birbank brendinə keçəcəyini bildirmişdi:
"Bir neçə gün olardı ki bu, reallaşmışdı. Və birdən birə Birbank çökdü.
İndiyədək Birbank-ın, Kapital Bankın belə uzunmüddətli çöküşü olmayıb. Əlbəttə, rebrendinq təkcə ad dəyişikliyi deyil".
Osman Gündüz bildirib ki, rebrendinqdə Kapital Bank sistemlərinin Birbanka inteqrasiyasında, miqrasiya proseslərində məlumat bazalarında problemlər olub:
"Güman ki, aparılan zəruri olan update-yenilənmələrdən, tətbiq yenilənmələrindən sonra problemlər, məlumat bazalarında qüsurlar, texniki çatışmazlıqlar və s olub.
Aparılan testlər yetərli də olmayıb və bunları aşkar etmək mümkün olmayıb.
Beləliklə, ötən ilin sonu baş tutan rebrendinqlə bu günkü Birbank çöküşü arasında böyük ehtimalla bağlantı var".
Ekspert qeyd edib ki, ikinci ən böyük ehtimal odur ki, Kapital Bank sistemlərinə qarşı yönəlmiş DDoS hücumlar və ya digər kiber hücumlar olub:
"İstənilən halda, ötən ilin yekununda təxminən 200 milyon gəlir götürən, ölkənin ən böyük bankı statusu olan bir bankın 5 saat müddətində sistemini bərba edə bilməməsi çox düşündürücüdür.
Dəymiş ziyan güman ki yüz minlərlə ölçülə bilər. Belə bir hal heç bir standartlara sığmır.
Problemin həlli üzərində Kapital Bankın uzun müddət işləməsinə baxmayaraq bərpanın uzanması göstərir ki, problem çox ciddidir. Normal bir açıqlama olmadığı halda bu tip vəziyyət isə müştəri inamını sarsıda bilər. Belə uzunmüddətli dayanma banka etibarı sarsıda bilər, belə veziyyet bankın beynəlxalq nüfuzu, reputasiyası üçün ciddi risklər yaradır".
Qeyd edək ki, axşam saatlarında
Birbank tətbiqində problem yaranıb.
İstifadəçilər kartlarını bu tətbiqdə silinmiş olaraq görürlər. Sanki heç bir kart tətbiqə əlavə edilməyib.
Bildirək ki, bununla bağlı Kapitaı Bank
açıqlama da yayıb.
