Bakıda keçiriləcək “Evrovizion” musiqi yarışması çərçivəsində Rabitə və İnformasiya Texnologiyaları Nazirliyi rəqəmli teleradio yayımı sistemini istifadəyə verəcək.
Bu barədə rabitə və informasiya texnologiyaları naziri Əli Abbasov jurnalistlərə açıqlamasında deyib. Onun sözlərinə görə, yeni sistemin sınağına yaxın günlərdə başlanılacaq. Bununla yanaşı, özəl şirkətlər rəqəmsal formatda kommersiya yayımı üçün imkanlarla təmin ediləcəklər.
Mayın 22-26-da Bakıda keçiriləcək “Evrovizion” mahnı yarışmasına qədər HD televizor və radiolar buraxılacaq. İlin sonuna qədər isə ölkə əhalisi tamamilə rəqəmsal TV şəbəkəsi ilə əhatə olunacaq.
Abbasov, həmçinin internet-provayderlərin, mobil operator xidmətlərinin, “Evrovizion” müsabiqəsinin rəsmi saytının (eurovision.az) normal fəaliyyətinin tam təmin edildiyini qeyd edib . Nazir bundan sonra əsas vəzifələrinin sistemin etibarlı fəaliyyətinin təminatı və tədbirlərin mümkün kiberhücumların qarşısını almaqla keçirmək olduğunu deyib: “Bütün işlər qrafikə uyğun olaraq aparılır və telekommunikasiya, radio, televiziya və internetlə bağlı hər hansı problem gözlənilmir”.
