TV VƏ RADİO

Azərbaycanda rəqəmsal televiziya yayımına keçid prosesi tam başa çatandan sonra ölkə əhalisi heç bir əlavə qurğu və ya avadanlıqların köməyi olmadan onlarla yerli və xarici kanalları izləyə biləcək.

Bu barədə APA-ya rabitə və informasiya texnologiyaları nazirinin müavini İltimas Məmmədov bildirib. Onun sözlərinə görə, hazırda rəqəmsal yayım ölkə ərazisinin 30-40%-ni əhatə edir, ilin sonunadək bu rəqəm 60%-ə çatacaq: “Bütün işlər başa çatandan sonra ölkə əhalisi hər hansı əlavə qurğu, peyk antennası və s.-dən istifadə etmədən 10-larla televiziya kanallarına baxa biləcək. İlikin mərhələdə Bakıda 60, rayonlarda isə 30 kanalın açıq yayımlanması nəzərdə tutulur”. Bununla yanaşı, İ.Məmmədov bildirib ki, buna televiziyaların imkanları da cavab verməlidir: “Yəni, televizorlar ya rəqəmsal olmalı, ya da analoq olsalar da, onlara rəqəmsal yayım üçün müvafiq qurğular qoşulmalıdır”. Nazir müavininin sözlərinə görə, rəqəmsal kanalların bir hissəsi pulsuz, digərləri pulla yayımlanacaq: “Digər kanallar üçün əlavə ödəniş tələb olunacaq”.

Rəqəmsal televiziyanın işə düşməsi ilə əlaqədar olaraq ölkədə yayımla məşğul olan şirkətlərə hansı kanalların pulsuz, hansılarının isə pullu yayımlana bilməsi barədə məlumat veriləcək. Ödənişsiz yayımlanacaq kanalların siyahısı rəsmi qərarla təsdiqlənəcək və bu qərar bütün yayım şirkətləri üçün məcburi olacaq. Bu məsələ ilə bağlı qərarlar Milli Teleradio Şurası ilə birlikdə qəbul olunacaq. Qeyd edəek ki, Beynəlxalq Telekommunikasiya İttifaqının qərarına əsasən, 2015-ci ilədək bütün ölkələr rəqəmsal yayıma keçməlidir. Azərbaycanda elə indi də rəqəmsal televizorlar vasitəsilə 10 kanal izləmək mümkündür. Gələcəkdə isə bunların sayının artması gözlənilir.