TƏDBİRLƏR

Elektron Təhlükəsizlik Xidmətində (ETX) 8 Noyabr – Zəfər Gününə həsr olunan tədbir keçirilib.

Xeberler.az bildirir ki, tədbir Azərbaycan Respublikasının Dövlət Himninin səsləndirilməsi və Vətən uğrunda canından keçmiş şəhidlərin xatirəsinin birdəqiqəlik sükutla yad edilməsi ilə başlayıb.

ETX-nin rəisi Fərid Zeynalov tədbir iştirakçılarını salamlayaraq Zəfər Gününün beşinci ildönümü münasibətilə əməkdaşları təbrik edib. O bu qələbənin Prezident, Müzəffər Ali Baş Komandan İlham Əliyevin qətiyyətli rəhbərliyinin, güclü Ordumuzun və xalqımızın sarsılmaz birliyinin nəticəsi olduğunu vurğulayıb. Fərid Zeynalov qeyd edib ki, bu Zəfər yalnız hərbi qələbə deyil, həm də ədalətin bərpası və milli iradənin təntənəsidir.

Daha sonra çıxış edən ETX rəisinin müavini Elvin Şahverdiyev 44 günlük Vətən müharibəsində Azərbaycanın həm döyüş, həm də informasiya cəbhəsində qalib gəldiyini bildirib. O vurğulayıb ki, müharibə dövründə düşmənin yaydığı təxribat xarakterli məlumatlar və həyata keçirilən kiberhücumlar ölkəmiz tərəfindən vaxtında və uğurla dəf edilib.

Tədbirdə, həmçinin Zəfər Gününə həsr olunan videoçarx nümayiş etdirilib. Videoçarxda qələbənin mənəvi gücü, Qarabağda aparılan bərpa-quruculuq işləri və Böyük Qayıdış prosesi əksini tapıb.