RƏQƏMSAL DÜNYA

Cənubi Koreyanın KT telekommunikasiya şirkəti Wi-Fi qoşulma ilə LTE şəbəkələrini özündə birləşdirəcək dünyanın ən sürətli Giga-LTE mobil şəbəkəsini kommersiyalaşdıracağını bəyan edib.

Xəbərlər-in RYTN-nin rəsmi saytına istinadən verdiyi məlumata görə, yeni texnologiya istifadəçilərə giqabitlərlə sürət təklif etməklə onları 5G yeni nəsil şəbəkə standartına bir addım daha da yaxınlaşdırır.

Texnologiya saniyədə 1,17 giqabit sürətini təmin edir ki, bu da adi LTE şəbəkələrinin sürətini 15 dəfə, üçdiapazonlu LTE-Advanced şəbəkələrinin sürətini 4 dəfə üstələyir.

KT nümayəndələri bildirib ki, istifadəçilər 18 giqabayt tutumlu Ultra HD formatında filmləri 126 saniyəyə, ümumi tutumu 3 giqabayt olan 100 musiqi faylını 21 saniyəyə yükləyə biləcəklər. Mövcud üçdiapazonlu LTE-Advanced şəbəkələrində 1 giqabayt tutumlu faylların yüklənməsinə minimum 28 saniyə, genişzolaqlı LTE-Advanced şəbəkələrində 38 saniyə tələb olunur.

Yeni şəbəkə xidməti artıq bu həftədən Samsung Galaxy S6 və Samsung S6 Edge istifadəçilərinə göstərilməyə başlayacaq və tədricən ondan digər smartfon istifadəçiləri yararlana biləcək. İstifadəçilər Giga-LTE xidmətinə mobil qurğulara pulsuz proqram təminatı quraşdırmaqla keçə biləcəklər.

KT ötən ilin sentyabrından Samsung Electronics ilə birlikdə Giga-LTE-nin yaradılması üzərində iş aparır.

Xeberler.az