TƏHLÜKƏSİZLİK

Azərbaycan Respublikasının Prezidenti yanında QHT- lərə Dövlət Dəstəyi Şurasının maliyyə dəstəyi və “Paradiqma” İctimai-siyasi tədqiqatlar ictimai birliyinin təşkilatçılığı ilə “Ermənistan-Azərbaycan, Dağlıq Qarabağ münaqişəsinin tənzimlənməsində informasiya təhlükəsizliyi təminatının gücləndirilməsi” layihəsinin təqdimat mərasimi keçirilib. 

Təşkilatdan Xəbərlər-ə verilən məlumata görə, tədbirin keçirilməsində məqsəd Ermənistan-Azərbaycan, Dağlıq Qarabağ münaqişəsinin tənzimlənməsi prosesində informasiya təhlükəsziliyinin daha etibarlı təminatı yolları və vasitələrinin müəyyən edilməsi istiqamətində innovativ elmi-analitik araşdırmalara start verməkdən ibarətdir. 

Tədbir çərçivəsində “Paradiqma” ictimai siyasi tədqiqatlar ictimai birliyinin sədri, professor Elman Nəsirov layihənin əhəmiyyətinə toxunaraq qeyd edib ki, XXI yüzilliyin informasiya əsri olduğunu bir an belə unutmamalı və bu reallıqdan çıxış edərək Ermənistanın təcavüzkar siyasəti və onun ağır nəticələri haqqında təbliğat-təşviqat kampaniyasını innovativ metodlarla zənginləşdirməli, bu istiqamətdə informasiya məkanında üstünlüyümüzü təmin etməliyik. Məsələyə bu kontekstdə yanaşdıqda təqdimatını keçirdiyimiz layihənin həm elmi, həm də böyük siyasi aktuallıq kəsb etdiyi qənaətinə gələ bilinər. 

Professor Namiq Axundov və dosent Firdovsiyyə Əhmədova, layihə çərçivəsində təlimçilər Telman Məmmədov  və Yusif Ağayev, ekspertlər Mürtəza Həsənov və Araz Qədiməliyev layihənin  əhəmiyyətindən bəhs edib, onun reallaşdırılması istiqamətində atılacaq addımlar haqqında  fikir və mülahizələrini ifadə ediblər. Sonra layihə ətrafında geniş fikir mübadiləsi aparılıb, konkret təklif və tövsiyələr irəli sürülüb. 

Təqdimat mərasimində Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının əməkdaşı, QHT təmsilçiləri, mətbuat nümayəndələri,  müxtəlif ali məktəblərin bakalavr, magistr və doktorantları iştirak edib.

Xeberler.az