RƏQƏMSAL DÜNYA

Dekabrın 19-da Beynəlxalq Mətbuat Mərkəzində Elektron Hökumət Portalının operatoru – Rabitə və Yüksək Texnologiyalar Nazirliyinin Məlumat Hesablama Mərkəzi "Mənim elektron hökumətim” adlı məqalə və video süjet müsabiqəsinin qaliblərinin elan edilməsi və mükafatlandırma mərasimi keçirilib.

Xeberler.az-ın məlumatına görə, tədbiri Mərkəzin ictimaiyyətlə əlaqələr üzrə mütəxəssisi Ruhəngiz Mehmanqızı açaraq bildirib ki, müsabiqəyə 7 videomaterial və 48 məqalə təqdim edilib. Və qaliblər artıq müəyyən edilib.

Mərkəzin direktoru Nail Mərdanov müsabiqənin məqsədlərindən danışıb. O, bildirib ki, əsas məqsədimiz elektron hökumət, elektron xidmətlərin təbliğatını daha da genişləndirmək, ictimaiyyəti daha da yaxından məlumatlandırmaq və media mənsublarını işimizə daha yaxından cəlb etməkdir: “Artıq iki ildir ki, belə bir müsabiqə keçirilir. Müsabiqənin əhəmiyyəti ondan ibarətdir ki, artıq media işçilərimize-höküməti daha dərindən öyrənə bilir və mətbuatda müxtəlif yazılarla çıxış edirlər. Bu da bizə elektron hökümət quruculuğu sahəsində sosial tələblərin müəyyənləşdirilməsində yaxından kömək edir”.

Nail Mərdanov vurğulayıb ki, müsabiqəyə təqdim olunan bütün məqalələr öyrənilib, sosial tələb və təkliflər ümumiləşdirilib. Bütün bu tələb təkliflər müvafiq qurumlara göndəriləcək və elektron hökumətin işində yararlı məlumat kimi istifadə olunacaq.

Tədbirdə çıxış edən Orta Asiya və Güney Qafqaz Söz azadlığı Şəbəkəsinin sədri Azər Həsrət bildirib ki, ictimai rəyin formalaşmasında elektron hökümətin özünə əsaslı şəkildə yer tuta bilməsində bu müsabiqənijn böyük rolu olacaq: “Yazıları nəzərdən keçirəndə o açıdan baxmağa çalışdıq ki, bu yazıları oxuyan sadə oxucu həmin yazılardan nə isə öyrənə bilsin. Bu müsabiqədəki yazılar daha böyük kütlənin diqqətini cəlb edə bilir və insanları maarifləndirir. Yazıların yoxlanılmasında maksimum obyektiv olmağa çalışdıq. QHT vətəndaş cəmiyyətləri, jurnalistlər, elmi dairələrin nümayəndələrinin iştirakı ilə biz dəyərləndirmə apardıq və ümid edirik ki, qaliblər sevinəcək. Qalib gəlməyənlər isə kədərlənməyəcək, çünki bir yarış varsa, orada həm qalib var, həm də qalib olmayan. Ləyaqətli şəkildə məğlub olmağın özü bir gözəllikdir”.

İnformasiya Texnologiyaları İnstitutunun şöbə müdiri Rasim Mahmudov  elektron vətəndaşın yetişdirilməsinin vacib məsələ olduğunu deyib. O, qeyd edib ki, vətəndaşlar elektron xidmətləri qəbul edib, xidməti mənimsəməyə hazır olmalıdır: “Ona görə də, bu layihə uğurlu bir layihədir. Ümid edirəm ki, müsabiqədəki nominasiyaların sayı artırılacaq”, deyə Rasim Mahmudov əlavə edib.

Rabitə və yüksək texnologiyalar nazirinin müavini Elmir Vəlizadə müsabiqəyə təqdim olunan məqalələrlə tanış olduğunu və münsiflər heyətinin öz işinə məsuliyyətli və obyektiv yanadığını diqqətə çatdırıb.

Sonra qaliblərin mükafatlandırılması mərasimi baş tutub.

"Mənim Elektron Hökumətim" məqalə və video süjet müsabiqəsinin qalibləri: 

1-ci yerin qaliblərinə  - 2500 manat , 2-ci yerin qaliblərinə isə  1500 manat pul mükafatı verilib.

 3,4,5-ci yerin qaliblərinə  noutbuk hədiyyə olunub.

 Hər bir iştirakçıya e-imza vəsiqəsi və kart oxuyucu təqdim edilib.