Microsoft və LG Electronics dostlaşıblar
Microsoft və LG Electronics mobil texnologiyalar sahəsində əməkdaşlıqla bağlı müqavilə imzalayıblar. LG şirkətinin təmsilçiləri bəyan ediblər ki, müqavilə şirkətlərin elmi tədqiqatlarla, marketinq və servislə bağlı işlərinə aiddir. Rəhbərliyin ümumi yığıncağında menecerlər birgə marketinq strategiyasını qurublar. Müqavilə Microsoft-un icraçı direktoru Stiv Balmerin Cənubi Koreyaya səfəri zamanı imzalanıb.
Microsoft rəhbərliyi ümid edir ki, Windows Mobile əməliyyat sistemi Nokia-nın Symbian əməliyyat sistemi ilə ciddi rəqabət aparacaq. Hazırda mobil telefonların 66%-i Symbian ilə işləyir. Onu da qeyd etmək lazımdır ki, Microsoft-un əməliyat sistemləri ilə yanaşı, Research in Motion-un Blackberry, Apple-in iPhone, Google-un Android əməliyyat sistemi ilə rəqabətdə Nokia-ya Symbian pozisiyası ilə ayaqda durmaq lazım gələcək. LG-nin Microsoftla əməkdaşlığına baxmayaraq, o, Symbian Foundation-un üzvüdür və Android istifadə edən modellərdən heç də çəkinmir.
