TƏDBİRLƏR

Avqustun 20-də Riqada NATO-nun Strateji Kommunikasiyalar Mərkəzinin təntənəli açılış mərasimi olub.

İlin əvvəlindən fəaliyyət göstərən mərkəzin açılış mərasimində Latviya Prezidenti Raymond Veyonis, Litva Prezidenti Dalya Qribauskayte, Şimali Atlantika Alyansı baş katibinin müavini Ceymş Appaturay, ABŞ senatorları Con Makkeyn, Şeldon Uaythaus və Con Baraso iştirak ediblər. Gözlənildiyinə görə, Strateji Kommunikasiyalar Mərkəzi NATO-nun fəaliyyətini əlaqələndirəcək, alyansın informasiya və psixoloji əməliyyatlara hazırlığını təmin edəcək.

Xeberler.az AzərTac-a istinadən xəbər verir ki, mərkəzin açılışı münasibətilə Latviya paytaxtında “Strateji kommunikasiyalar haqqında Riqa dialoqu: qavrama əhəmiyyət daşıyır” mövzusunda ikigünlük konfrans keçiriləcək. NATO ölkələrinin, habelə Ukrayna və Gürcüstanın nümayəndələri tədbir çərçivəsində münaqişələr dövründə sosial medianın rolunu müzakirə etməyi planlaşdırırlar. Ekspertlər böhranlı vəziyyətlər dövründə KİV-in cəmiyyətə təsirini də müzakirə edəcəklər.

Mərkəzin Riqa bölməsinə artıq beynəlxalq hərbi təşkilat statusu verilib. Bu, Baltik regionunda üçüncü belə mərkəzdir. Daha əvvəl Estoniyada Kibertəhlükəsizlik Məsələləri Mərkəzi, Litvada Energetika Məsələləri Mərkəzi açılıb.

Latviya Prezidenti Raymond Veyonis açılış mərasimində çıxış edərək bildirib ki, strateji kommunikasiyalar anlayışı 2012-ci ildə uzaq bir məsələ idisə, bizim günlərdə artıq reallığa çevrilib. Prezident müasir informasiya və hibrid müharibələri dövründə strateji kommunikasiyaların rolunu vurğulayaraq deyib: “Hər gün insanların zəkaları və ürəkləri uğrunda mübarizə gedir. Bu gün biz hər hansı vəziyyətə hazır olmalıyıq. Strateji kommunikasiyanın əhəmiyyəti gündən-günə artır”. Mərkəzin komandasına uğurlu fəaliyyət və yaxşı ideyalar arzulayan Prezident əmin edib ki, Latviya NATO-nun ümidlərini doğrultmaq üçün mümkün olan hər şeyi edəcək.

Litva Prezidenti Dalya Qribauskaytenin sözlərinə görə, Baltik ölkələrində qabaqcıl təcrübə mərkəzlərinin açılması bu ölkələrin müəyyən səviyyəyə çatmasına işarədir. Bu, həm də aydın şəkildə NATO ilə həmrəyliyə işarədir. Prezident deyib: “Ümidvaram ki, Mərkəz NATO-nun strateji kommunikasiyalarını və müdafiə qabiliyyətini gücləndirəcək”.

Mərkəz fəaliyyət proqramları işləyib hazırlamağı, təlimlər təşkil etməyi və NATO təlimlərinə qatılmağı planlaşdırır. Bu, strateji kommunikasiyalarla bağlı məsələlərdə NATO-nun iştirakçısı olan ölkələrə və qurumun qərargahlarına birbaşa dəstək göstərəcək. NATO-nun Strateji Kommunikasiyalar Mərkəzi bütün iştirakçı ölkələr üçün əlçatan həllər və imkanlar üzərində çalışır. Bu, NATO-nun həmin sahədə artıq mövcud imkanlarını əhəmiyyətli dərəcədə genişləndirəcək.

Riqada Strateji Kommunikasiyalar Mərkəzi milli təsisat kimi artıq bu il yanvarın 1-dən fəaliyyət göstərir. Latviya Nazirlər Kabineti səfir Yanis Karklinyanı mərkəzin direktoru təyin edib.