RƏQƏMSAL DÜNYA

Məlum olduğu kimi, ötən il 27-29 oktyabr tarixlərində  NATO-nun Sülh və Təhlükəsizlik naminə Elm Proqramının dəstəyi, İnformasiya Texnologiyaları İnstitutu və Polşa Milli Nüvə Tədqiqatları Mərkəzinin birgə təşkilatçılığı ilə “Sənaye idarəetmə sistemlərinin kibertəhlükəsizliyi problemləri” mövzusunda onlayn beynəlxalq konfrans keçirildi. 

Konfransda “Kritik infrastrukturların kibertəhlükəsizliyi”, “Kibertəhlükəsizlik üzrə təhsil: proqramlar və laboratoriyalar”, “Həssaslığın təhlili, yoxlanılması və risk menecmenti”, “Hücumların aşkarlanması, təsirinin azaldılması və qarşısının alınması” və s. istiqamətlər üzrə müzakirələr aparıldı. 

İnformasiya Texnologiyaları İnstitutunun əməkdaşlarının həmin beynəlxalq konfransda təqdim etdikləri məruzələr NATO-nun Sülh və Təhlükəsizlik Naminə Elm Seriyasından növbəti – “Sənaye idarəetmə sistemləri vasitəsilə kritik infrastrukturların mühafizəsinin təmin edilməsi üçün kibertəhlükəsizlik” adlı kitabın “İnformasiya və Kommunikasiya Təhlükəsizliyi” bölməsinə çap olunub.

Bu barədə Xeberler.az-a İnformasiya Texnologiyaları İnstitutundan məlumat verilib. 

Kitabda çap olunan 28 məqalədən 22-nin müəllifləri İnformasiya Texnologiyaları İnstitutunun əməkdaşlarıdır.

Belə ki, kitabdakı məqalələr kiber-fiziki sistemləri, dəniz neft-qaz platformasında çalışan işçilərin sağlamlığının və təhlükəsizliyinin intellektual idarə olunması sisteminin arxitekturası, ontologiya vasitəsilə kibertəhlükəsizliyin təmin olunması üçün intellektual proqram sisteminin işlənilməsi, pilotsuz uçuş aparatlarının aşkarlanması metodlarının müqayisəli təhlili”, Sənaye 4.0 çağırışlarının demoqrafik proseslərə təsirinin təhlili və tədqiqi kimi yeni dövr texnoloji trendlərlə bağlıdır.

Qeyd edək ki, NATO-nun Sülh və Təhlükəsizlik Naminə Elm Seriyası NATO-nun Sülh və Təhlükəsizlik Naminə Elm Proqramının dəstəyi ilə, nüfuzlu “Springer” və “IOS Press” nəşriyyatları tərəfindən çap olunur. Eyni zamanda “Sənaye idarəetmə sistemləri vasitəsilə kritik infrastrukturların mühafizəsinin təmin edilməsi üçün kibertəhlükəsizlik” kitabı DBLP bazasında indeksləşir.