AZNET

Naxçıvan Dövlət Universitetinin (NDU) bütün binaları arasında fiber-optik kabellə şəbəkə qurulub, 108 hektarlıq kampusda simsiz internet şəbəkəsi yaradılıb.

Xeberler.az-ın məlumatına görə, bunu universitetin rektoru, AMEA-nın müxbir üzvü Saleh Məhərrəmov bildirib.

Saleh Məhərrəmov, virtual əməkdaşlığın genişləndirilməsi, beynəlxalq videokonfransların təşkili üçün universitetdə lazımi şəraitin olduğunu bildirib.

Qeyd edək ki, Avropa İttifaqının TEMPUS proqramı çərçivəsində “Davamlı turizmin idarəolunması sahəsində beynəlxalq bakalavr və magistr proqramları üçün yeni modulların hazırlanması” adlı üçgünlük təlim işə başlayıb.

Təlimdə iştirak edən qonaqlara universitetin İnformasiya-Kommunikasiya Texnologiyaları Mərkəzində quraşdırılan server avadanlıqları, elektron mühafizə və müşahidə sistemləri, imtahanların elektron qaydada keçirilməsi haqqında da məlumat verilib.

Təlimdə layihənin Azərbaycan üzrə tərəfdaş təşkilatları sırasında olan - Azərbaycan Turizm və Menecment Universiteti, Azərbaycan Dövlət Aqrar Universiteti və Naxçıvan Dövlət Universitetinin nümayəndələri, müəllim və magistrlər iştirak edirlər.

Qeyd edək ki, üç gün davam edəcək təlimdə “destinasiya menecmenti”, “davamlı turizm”, “ekoturizm” və digər modullar üzrə seminar məşğələləri keçiriləcək, müzakirələr aparılacaq.

Xeberler.az