TEXNOLOGİYA

GEANT tərəfindən təqdim olunan qabaqcıl texnoloji xidmətlərdən biri olan Eduroam-ın (education roaming) AzScienceNet vasitəsilə ölkənin elmi-tədqiqat institutları və ali təhsil müəssisələrində tətbiqi və genişləndirilməsi Azərbaycanın elmi və akademik mühitinin Avropa tədqiqat və təhsil məkanına inteqrasiyasını sürətləndirmək baxımından mühüm əhəmiyyət daşıyır.

Xeberler.az bildirir ki, bu yaxınlarda Elm və Təhsil Nazirliyinin İnformasiya Texnologiyaları İnstitutunun AzScienceNet Şəbəkə İdarəetmə Mərkəzinin əməkdaşları tərəfindən Azərbaycan Texniki Universiteti (AzTU) və Naxçıvan Dövlət Universitetinin (NDU) şəbəkə infrastrukturunun AzScienceNet elm-kompüter şəbəkəsinin Data Mərkəzində yerləşən Milli Eduroam Serverinə qoşulması təmin olunub.

Belə ki, AzScienceNet Şəbəkə İdarəetmə Mərkəzinin rəhbəri, texnika üzrə fəlsəfə doktoru Babək Nəbiyev və baş mütəxəssis Orxan Mənsimzadə 29 aprel - 2 may 2025-ci il tarixlərində Naxçıvan Dövlət Universitetinə səfər çərçivəsində universitetin müasir şəbəkə infrastrukturunun gücləndirilməsi istiqamətində bir sıra texniki işlər həyata keçiriblər. Səfər zamanı “Lola” sisteminin quraşdırılması ilə yanaşı, beynəlxalq Eduroam xidməti də universitetdə uğurla tətbiq olunub. Həyata keçirilən bu təşəbbüs NDU-nun qlobal elm və təhsil şəbəkələrinə inteqrasiyasını daha da gücləndirməklə yanaşı, tələbə və müəllim heyətinin ölkədaxili və beynəlxalq səfərləri zamanı təhlükəsiz, rahat və fasiləsiz İnternet bağlantısı əldə etməsinə imkan yaradır.

Eyni zamanda, AzTU və NDU-da Wi-Fi və Eduroam xidmətlərinin yaradılması istiqamətində bir sıra mühüm işlər həyata keçirilib. AzScienceNet Şəbəkə İdarəetmə Mərkəzinin texniki dəstəyi ilə hər iki universitetin müəllim və tələbələri dünya standartlarına uyğun yüksək səviyyəli şəbəkə texnologiyaları və xidmətlərindən istifadə imkanına malik olublar. Nəticədə, hər iki universitetin akademik heyəti Avropa Elm və Təhsil Şəbəkələri Assosiasiyası – GEANT tərəfindən təqdim edilən Eduroam xidmətlərinə çıxış əldə edərək yerli və beynəlxalq elmi-tədqiqat mühitinə daha effektiv inteqrasiya olunub.

Qeyd edək ki, Eduroam xidməti alim, tədqiqatçı, müəllim və tələbələr üçün İnternetə təhlükəsiz və sərbəst çıxış imkanı yaradan beynəlxalq rouminq xidmətidir. Bu xidmətə qoşulan istifadəçilər ölkə daxilində və xaricdə minlərlə elm və təhsil qurumunun ərazisində simsiz şəbəkə üzərindən ödənişsiz və təhlükəsiz İnternet bağlantısından yararlana bilirlər. Hazırda Eduroam xidməti dünyanın 106 ölkəsində 6 mindən çox təhsil və tədqiqat qurumunda istifadə olunur və ümumilikdə 38 mindən artıq müəssisədə aktivdir.

Bu gün ölkəmizdə 35 təşkilatda Eduroam xidməti quraşdırılıb. Digər elmi qurumlar və ali təhsil müəssisələrində də bu xidmətin istifadəyə verilməsi istiqamətində müvafiq işlər davam etdirilir.