SÜNİ İNTELLEKT VƏ DATA

Bugünkü məqsədimiz əmək bazarının gələcək inkişafını müəyyənləşdirən mühüm dialoqa və strateji fikir mübadiləsinə olan tələbdir. Əminəm ki, sammit çərçivəsində aparılacaq müzakirələr ölkəmizin sosial-iqtisadi inkişaf prioritetlərinə dəyərli töhfələr verəcək. “Gələcəyə tərəf” devizi altında keçirilən bu sammit insan kapitalının inkişafı, rəqabətədavamlı kadr potensialının formalaşdırılması və bilik iqtisadiyyatının möhkəmləndirilməsi istiqamətində dövlətimizin ardıcıl və məqsədyönlü siyasətinin göstəricisidir.

Xeberler.az məlumat verir ki, bunu əmək və əhalinin sosial müdafiəsi naziri Anar Əliyev Bakıda ilk dəfə keçirilən “Gələcəyin Peşələri Sammiti: Bakı-2025”də çıxış edərkən deyib. Nazir qeyd edib ki, ilk dəfə bu ilin oktyabr ayında Naxçıvan şəhərində keçirilən bu sammit əmək bazarında formalaşmaqda olan yeni peşə və bacarıqlara dair tələblərin peşəkar müstəvidə müzakirəsi baxımından xüsusi əhəmiyyət kəsb edir. Həmçinin əmək bazarında sürətlə baş verən dəyişikliklərə çevik adaptasiya imkanlarının qiymətləndirilməsi də sammitin prioritet istiqamətlərindən birini təşkil edir. “Qlobal miqyasda baş verən proseslər göstərir ki, süni intellektin sürətli inkişafı, rəqəmsallaşmanın genişlənməsi və avtomatlaşdırmanın yeni mərhələsi dünya əmək bazarının strukturunu köklü şəkildə yenidən formalaşdırır. Nəticədə bir çox ənənəvi peşələr yeni məzmun qazanır, əmək resurslarına yönəlik tamamilə fərqli bacarıq profilləri meydana çıxır. Dünya İqtisadi Forumunun 2025-ci ildə dərc olunan “İşlərin Gələcəyi Hesabatı”na əsasən 2030-cu ilə qədər bugünkü iş yerlərinin 22 faizinin struktur dəyişikliklərinə məruz qalacağı gözlənilir”,- deyə nazir qeyd edib.