Azərbaycan Respublikasının Nazirlər Kabineti “Elektron notariat” informasiya sistemi ilə bağlı mövcud qərarda dəyişikliklər edib.
Xeberler.az bildirir ki, qərar, Azərbaycan Respublikası Konstitusiyasının 119-cu maddəsinin səkkizinci abzasına uyğun olaraq, eləcə də bir sıra qanunvericilik aktlarına edilmiş dəyişikliklərin tətbiqi məqsədilə qəbul olunub. Dəyişikliklər, həmçinin Azərbaycan Respublikası Prezidentinin 2025-ci il 1 avqust tarixli 462 nömrəli Fərmanının icrası ilə əlaqədardır.
Sənədə əsasən, “Elektron notariat” informasiya sistemi haqqında Əsasnamənin təsdiq edilməsi barədə Nazirlər Kabinetinin 2021-ci il 12 oktyabr tarixli 307 nömrəli qərarının 4-cü hissəsi yeni redaksiyada təqdim edilib. Yeni redaksiyaya görə, həmin qərarda dəyişikliklər Prezidentin 2023-cü il 6 oktyabr tarixli 2328 nömrəli Fərmanı ilə təsdiq olunmuş normativ hüquqi aktların hazırlanması və qəbul edilməsi qaydalarına uyğun şəkildə edilə bilər.
Bundan əlavə, Əsasnamənin 12.3.16-cı yarımbəndinə də əlavə edilib. Dəyişikliyə əsasən, “İcra haqqında” qanunda nəzərdə tutulmuş hallarda daşınmaz əmlak və rəsmi reyestrdə qeydiyyata alınan daşınar əmlak üzərində hüquqların rəsmiləşdirilməsi üçün tərtib olunan protokollar, eləcə də notarius vasitəsilə bağlanan alqı-satqı müqaviləsi əsasında satılmalı olan əmlak barədə icra məmurunun qərarı da sistemdə əks olunacaq.
Qeyd edək ki, edilən dəyişikliklər “Elektron notariat” informasiya sisteminin funksionallığının genişləndirilməsinə və hüquqi prosedurların daha da rəqəmsallaşdırılmasına xidmət edir.
