TƏDBİRLƏR

"NEQSOL Holding" Leadership Excellence and Acceleration Program (L.E.A.P.) adlanan istedadların idarə edilməsi eksklüziv qlobal proqramına start verib. L.E.A.P. holdinqin gələcək inkişafını təmin edəcək yüksək ixtisaslı istedad fondu yaratmağı hədəfləyir.

L.E.A.P. fərdi və qrup ehtiyaclarını nəzərə alaraq dünyanın aparıcı universitetləri, biznes məktəbləri və peşəkar xidmət şirkətləri ilə əməkdaşlıq çərçivəsində hazırlanmış unikal inkişaf proqramıdır. Proqramın strateji təhsil tərəfdaşı – liderlik, idarəetmə təlimi və tədqiqat sahəsində təcrübəsi ilə tanınan nüfuzlu SDA Bocconi Menecment Məktəbidir.

SDA Bocconi Menecment Məktəbi ilə yanaşı, L.E.A.P. çərçivəsində aparıcı kouçinq texnologiyası təminatçısı olan SparkUs şirkəti, eləcə də idarəetmə və biznes təcrübələri sahəsində fəaliyyət göstərən MIT Sloan Management Review nüfuzlu akademik jurnalı və veb-saytı ilə əməkdaşlıq qurulub.

L.E.A.P. çərçivəsində 60 iştirakçı Bakı və Milan şəhərlərində kompleks inkişaf proqramlarına qatılaraq fərdi kouçinq və mentorluq, potensialın sürətli inkişafı, rotasiya və liderlik inkişafı təlimlərində iştirak edəcək.

SDA Bocconi Menecment Məktəbinin tərtib etdiyi bir illik İstedadların Sürətli İnkişaf Proqramı iştirakçılara bacarıqlarını, biliklərini və liderlik potensiallarını inkişaf etdirmək üçün geniş imkanlar verəcək.

İnkişaf proqramlarının başlanmasını qeyd etmək üçün "NEQSOL Holding", şirkətlər qrupunun müxtəlif bölmələrindən seçilmiş iştirakçıları bir araya gətirən açılış tədbiri təşkil edib. Tədbir, əməkdaşların L.E.A.P. strukturu və məqsədləri haqqında məlumat əldə etmək, əlaqələri gücləndirmək və iştirakçılar arasında əməkdaşlığı təşviq etmək üçün imkan yaradıb.

"NEQSOL Holding" 9 ölkədə enerji, telekommunikasiya, yüksək texnologiyalar və tikinti sahələrində fəaliyyət göstərən beynəlxalq şirkətlər qrupudur.