E - HÖKUMƏT

Əmək və Əhalinin Sosial Müdafiəsi Nazirliyinin tabeliyində Dövlət Tibbi-Sosial Ekspertiza və Reabilitasiya Agentliyinin “Səsiniz olaq” adlı onlayn surdotərcümə xidmətindən artıq 130-dək şəxs faydalanıb.

Xeberler.az bildirir ki, Nazirliyin İctimaiyyətlə əlaqələr şöbəsindən verilən məlumata görə, iyulun 28-dən Azərbaycanda ilk dəfə olaraq fəaliyyətə başlayan həmin xidmət eşitmə və nitq məhdudiyyətli şəxslərin müraciətlərinin üçüncü tərəfə (dövlət qurumları, özəl sektor və s.) ötürülməsini təmin edir.

Beləliklə, həmin şəxslərlə işarət dili bilməyən tərəflər arasında “virtual körpü” funksiyası yerinə yetirilir. Yəni:

• vətəndaş videozəng və ya mesaj vasitəsilə operatorla əlaqə saxlayır;

• operator tərcüməçi funksiyasını icra edərək, müraciətin istiqamətinə uyğun üçüncü tərəflə əlaqə yaradır;

• surdotərcümə vasitəsilə onlayn kommunikasiya qurulur.

Xidmətdən yararlanmaq üçün 055 213 19 97 əlaqə nömrəsinə vatsap və ya teleqram platforması vasitəsilə və bazar günü istisna olmaqla, həftənin 6 günü (bazar ertəsi – şənbə) saat 9:00-dan 16:00-dək müraciət etmək olar.

Surdotərcümə xidməti eşitmə və nitq məhdudiyyəti olan şəxslərə müxtəlif istiqamətlərdə müraciətlərini aidiyyəti tərəflərə düzgün və rahat şəkildə çatdırmaq imkanı yaradır.

Layihə inklüziv mühitin dəstəklənməsi, eşitmə və nitq məhdudiyyəti olan şəxslərlə cəmiyyətin digər üzvləri arasında sosial ünsiyyət maneələrinin aradan qaldırılması, informasiya mübadiləsinin təmin edilməsi məqsədi daşıyır.