RƏQƏMSAL DÜNYA

Bakıda Dövlət İmtahan Mərkəzinin (DİM) təşkilatçılığı ilə təhsilin qiymətləndirilməsi və dövlət qulluğu sahəsində beynəlxalq konfrans öz işinə başlayıb.

Konfransdan əvvəl DİM rəhbərliyi və kollektivi Fəxri Xiyabanda ümummilli lider Heydər Əliyevin məzarını ziyarət edib, önünə əklil qoyaraq xatirəsini ehtiramla yad ediblər. Daha sonra akademik Zərifə Əliyevanın da məzarı ziyarət olunub.

Tədbirin əsas məqsədi təhsilin qiymətləndirilməsi və dövlət qulluğu sahəsində əldə olunmuş nailiyyətlərin və təcrübənin paylaşılması, eləcə də aktual məsələlərin müzakirəsidir. Konfransda Azərbaycanla yanaşı, Türkiyə, Qazaxıstan, Qırğızıstan, Özbəkistan, Tacikistan, Misir, Cənubi Afrika Respublikası və Keniyadan, həmçinin müxtəlif beynəlxalq təşkilatlardan 200-dən çox nümayəndənin iştirakı nəzərdə tutulur.

Rəsmi açılış mərasimində Azərbaycan Respublikasının Dövlət Himni səsləndirilib, daha sonra DİM-in 10 illik yubileyinə həsr olunan videoçarx nümayiş etdirilib.

Tədbiri giriş sözü ilə açan DİM İdarə Heyətinin sədri Məleykə Abbaszadə qonaqları salamlayaraq, qurumun 10 illik fəaliyyətinin milyonlarla vətəndaşın həyatında mühüm rol oynadığını vurğulayıb. O qeyd edib ki, ölkədə biliklərə əsaslanan qiymətləndirmə sisteminin formalaşdırılması ümummilli lider Heydər Əliyevin müəyyən etdiyi strateji xəttə əsaslanır və bu gün Prezident İlham Əliyev tərəfindən uğurla davam etdirilir.

Sədr həmçinin Birinci vitse-prezident Mehriban Əliyevanın təhsilin inkişafına verdiyi töhfələri xüsusi qeyd edib, qiymətləndirmə sisteminin daha humanist və ədalətli qurulmasında bu təşəbbüslərin mühüm rol oynadığını bildirib.

M.Abbaszadə son 10 ildə 6 milyondan çox insanın imtahan prosesindən keçdiyini diqqətə çatdıraraq, DİM-in artıq yalnız qəbul mexanizmi deyil, həm də ədalət infrastrukturunun vacib elementi olduğunu vurğulayıb. O, həmçinin “Holistic Assessment” yanaşması çərçivəsində koqnitiv, sosial və emosional bacarıqların qiymətləndirilməsi istiqamətində görülən işlərdən danışıb.

Elm və təhsil naziri Emin Əmrullayev çıxışında bu cür beynəlxalq tədbirlərin əhəmiyyətini vurğulayaraq, Azərbaycanda tətbiq olunan mərkəzləşdirilmiş imtahan modelinin şəffaflıq və rəqabətin təmin olunmasında mühüm rol oynadığını bildirib.

Türkiyənin Ölçmə, Seçmə və Yerləşdirmə Mərkəzinin prezidenti Bayram Əli Ərsoy isə DİM-in qısa müddətdə regionda nüfuzlu qurumlardan birinə çevrildiyini qeyd edərək, onun şəffaf və elmi əsaslara söykənən fəaliyyətini yüksək qiymətləndirib.

Konfransda çıxış edən digər beynəlxalq nümayəndələr də tədbirin təcrübə mübadiləsi baxımından əhəmiyyətini vurğulayıblar.

Açılış mərasimində Kolumbiya Universitetindən Amra Sabik-El Rayessin videomüraciəti də təqdim olunub. Tədbir çərçivəsində Türk Dövlətləri Təşkilatına üzv ölkələrin imtahan mərkəzləri arasında əməkdaşlığın gücləndirilməsinə dair Niyyət Protokolu imzalanıb.

Konfrans çərçivəsində panel müzakirələr və müxtəlif sessiyalar təşkil olunacaq. Müzakirələrdə təhsildə qiymətləndirmənin strateji rolu, rəqəmsallaşma dövründə insan kapitalının inkişafı, elektron imtahan sistemləri və digər aktual mövzular əhatə ediləcək. Tədbir gün ərzində davam edəcək.