SÜNİ İNTELLEKT VƏ DATA

Oktyabrın 16-da Süni İntellekt və Verilənlər Elmi üzrə II Avrasiya Forumu öz işinə başlayıb.

Xeberler.az məlumat verir ki, Bakı Dövlət Universiteti (BDU), “Codelandia” MMC və İsrailin Ben-Qurion Negev Universitetinin birgə təşkilatçılığı ilə keçirilən tədbir dünyanın müxtəlif ölkələrindən alimləri, mütəxəssisləri və innovatorları bir araya gətirərək süni intellekt və verilənlər elmi sahəsində son nailiyyətlərin müzakirəsinə geniş imkan yaradır.

Üç gün davam edəcək forum süni intellekt nəzəriyyəsi, yeni üsulların işlənməsi və verilənlər elminin tibb, kibertəhlükəsizlik, idman və kənd təsərrüfatı kimi müxtəlif sahələrdə tətbiqinə dair fikir və təcrübə mübadiləsi üçün mühüm platformadır.

Tədbiri açan BDU-nun rektoru Elçin Babayev forumun beynəlxalq elmi əməkdaşlığın gücləndirilməsi baxımından əhəmiyyətini vurğulayıb, Prezident İlham Əliyevin informasiya texnologiyaları və rəqəmsal inkişaf sahələrinə göstərdiyi diqqət və qayğının bu istiqamətdə mühüm rol oynadığını qeyd edib.

Rektor, həmçinin BDU-da Süni intellektin etikası kafedrasının yaradıldığını bildirib. E.Babayev bu yeni struktur bölmənin süni intellekt tədqiqatlarında etik prinsiplərin, şəffaflığın və sosial məsuliyyətin təşviqinə xidmət edəcəyinə diqqət çəkib.

Açılış mərasimində İnnovasiya və Rəqəmsal İnkişaf Agentliyinin İdarə Heyətinin sədri Fərid Osmanov, Dördüncü Sənaye İnqilabının Təhlili və Koordinasiyası Mərkəzinin (4SIM) icraçı direktoru Fariz Cəfərov, Ben-Qurion Negev Universitetinin regional və sənaye inkişafı üzrə vitse-prezidenti Dan Blumberq, “Codelandia” şirkətinin rəhbəri Günel Cənnətova tədbirin əhəmiyyətindən danışıblar. Qeyd olunub ki, dünyada müşahidə olunan trendlər və çağırışlar süni intellekt, kibertəhlükəsizlik, verilənlər elmi və bu kimi istiqamətlərdə elmlərin inkişafını sürətləndirməyi tələb edir.

Tədbir çərçivəsində BDU və İsrailin Ben-Qurion Negev Universiteti arasında anlaşma memorandumu imzalanıb. Sənəddə iki universitet arasında beynəlxalq əməkdaşlığın dərinləşdirilməsi, birgə tədqiqatların, tələbə mübadiləsinin aparılması nəzərdə tutulub. Həmçinin süni intellekt və verilənlər elmi sahəsində ortaq təşəbbüslərin həyata keçirilməsi qeyd olunub.

Forumun elmi proqramında dünyanın tanınmış alimləri tərəfindən müxtəlif istiqamətlərdə məruzələr təqdim olunur. Məruzələrdə qlobal süni intellekt və məlumat bazarlarının inkişafı, süni intellektin səhiyyədə tətbiqində etik və praktiki çağırışlar, eləcə də informasiyanın strateji resursa çevrildiyi müasir dövrdə ali təhsilin rolu kimi mövzular əhatə olunur.

Tədbir çərçivəsində panel müzakirələr keçiriləcək, məruzələr dinləniləcək, fikir mübadiləsi aparılacaq. Bütün bunlar regionda süni intellekt və verilənlər elminin inkişaf perspektivləri barədə yeni ideyaların formalaşmasına kömək edəcək.