QANUNVERİCİLİK

Milli Təhlükəsizlik Nazirliyi (MTN) tərəfindən həyata keçirilən əməliyyat-axtarış tədbirləri nəticəsində Azərbaycanın qanunvericiliyi ilə müəyyən edilmiş qaydada dövlət qeydiyyatına alınmadan və xüsusi razılıq olmadan qanunsuz sahibkarlıq fəaliyyəti göstərərək Rabitə və İnformasiya Texnologiyaları Nazirliyinə külli miqdarda ziyan vurmuş şəxslər tutulublar.

MTN-in İctimai Əlaqələr Mərkəzindən APA-ya verilən məlumata görə, Türkiyə Respublikasının vətəndaşları - Kaplan Onur Tahsin oğlu, Kitiş Suat Osman oğlu və qeyriləri cinayət əlaqəsinə girərək, qanunvericiliklə müəyyən edilmiş qaydada dövlət qeydiyyatına alınmadan və xüsusi razılıq, yəni lisenziya tələb olunduğu halda belə lisenziya almadan qanunsuz sahibkarlıq fəaliyyəti göstəriblər.
Məlum olub ki, 2010-cu ilin aprel ayında Onur Kaplan, Suat Kitiş və qeyriləri «Azercell Telecom» MMC-nin mobil operator şəbəkəsində birtərəfli telefon danışıqları təşkil edən avadanlığa xüsusi texniki vasitələrlə qoşularaq icazəsiz beynəlxalq rabitə xidməti yaradıb külli miqdarda pul qazanmaq məqsədilə cinayət əlaqəsinə giriblər. Bundan sonra, adları çəkilən şəxslər və qeyriləri xaricdə istehsal olunmuş müxtəlif markalı «GSM» kanalpaylayıcılarını və digər texniki avadanlıqları əldə edərək, 2010-cu il oktyabr ayının əvvəlində Bakı şəhərinin Nərimanov rayonunda kirayə götürdükləri mənzildə quraşdırıb qanunsuz fəaliyyət göstərməyə başlayıblar.
Bu hüquqazidd əməllərini davam etdirən Onur Kaplan, Suat Kitiş və qeyriləri «Azercell Telecom» MMC-yə məxsus, ayrı-ayrı şəxslərin adına sənədləşdirilmiş 32 ədəd «GSM» mobil telefon nömrəsi alıb, bu nömrələri həmin xüsusi texniki avadanlıqlara daxil etdikdən sonra İnternetə qoşularaq Respublikası Rabitə və İnformasiya Texnologiyaları Nazirliyinin beynəlxalq avtomat telefon stansiyasında qeydiyyatdan keçmədən icazəsiz birtərəfli beynəlxalq telefon danışıqlarının ölkə rabitə şəbəkəsinə daxil olmasını təşkil ediblər. Göstərilən ünvana baxış keçirilərkən həmin avadanlıqlar işlək və şəbəkəyə qoşulmuş vəziyyətdə aşkar olunub. Müəyyən edilib ki, Onur Kaplan, Suat Kitiş və qeyrilərinin qanunsuz təşkil etdikləri beynəlxalq telefon danışıqları nəticəsində Rabitə və İnformasiya Texnologiyaları Nazirliyinə qısa müddət ərzində 18 min 345 manatdan artıq ziyan vurulub.

Qeyd olunub ki, həyata keçirilən bu əməliyyat-axtarış tədbirləri nəticəsində qanunsuz sahibkarlıq fəaliyyəti ifşa edilməklə yanaşı, eyni zamanda həmin rabitə şəbəkəsindən müxtəlif transmilli mütəşəkkil cinayətkar məqsədlər üçün mümkün istifadənin də qarşısı alınıb.
Faktla bağlı MTN-in İstintaq Baş İdarəsi tərəfindən Cinayət Məcəlləsinin 192.2.1-ci (külli miqdarda ziyan vurmaqla qanunsuz sahibkarlıqla məşğul olma) maddəsi ilə cinayət işi başlanılıb. Onur Kaplan və Suat Kitiş təqsirləndirilən şəxs qismində cəlb olunaraq məhkəmənin qərarı ilə barələrində həbs-qətimkan tədbiri seçilib.

Cinayət işi üzrə bütün halların araşdırılması, bu hüquqazidd əməllərin digər iştirakçılarının müəyyən olunması üçün zəruri istintaq hərəkətləri və əməliyyat-axtarış tədbirləri davam etdirilir.