TEXNOLOGİYA

Təəssüflə qeyd etməliyəm ki, iqlim dəyişikliyi sərhəd tanımayan bir problem olduğu üçün hər hansı bir ölkə bu problemlə üzləşə bilər. Lakin hüquqşünaslar olaraq bu problemə qarşı birgə səylər göstərməliyik. Ümumiyyətlə, peşəsindən asılı olmayaraq iqlim dəyişikliyi hər bir vətəndaşın gələcək həyatına təsir göstərə bilər.

Xeberler.az məlumat verir ki, bu sözləri Vəkillər Kollegiyasının sədr müavini və Hüquqi Yardım Mərkəzinin direktoru Şahmar Məmmədov jurnalistlərə açıqlamasında söyləyib. Ş.Məmmədov bu gün Bakı Konqres Mərkəzində keçirilən “İqlim dəyişiklikləri və enerji hüququ” konfransının əhəmiyyətinə toxunaraq bildirib: “Bu tədbir yalnız hüquqşünasların deyil, ümumilikdə cəmiyyətin maraqlarına toxunan çox aktual bir mövzuya həsr olunub. İqlim dəyişiklikləri və onun enerji sektoruna təsiri yalnız iqtisadi və hüquqi məsələlərlə məhdudlaşmır, eyni zamanda, sosial ədalət, ətraf mühitin mühafizəsi və gələcək nəsillərin hüquqlarının qorunması kimi vacib mövzuları da əhatə edir. Bu sahədə hüquqşünasların rolu qanunvericilik bazasının təkmilləşdirilməsi və iqlim böhranına qarşı mübarizədə hüquqi mexanizmlərin yaradılmasında olduqca vacibdir. Beynəlxalq əməkdaşlıq və təcrübə mübadiləsi bu istiqamətdə aparılan işlərə töhfə verəcək”.

“COP29 tədbirinin Azərbaycanda keçirilməsi ölkənin iqlim dəyişikliyi ilə mübarizə və davamlı inkişaf sahəsində göstərdiyi səylərin beynəlxalq səviyyədə tanınmasının bir göstəricisidir. Bu cür tədbirlər yalnız Azərbaycan üçün deyil, bütün region üçün əhəmiyyətli nəticələr doğuracaq və ekoloji dayanıqlığın gücləndirilməsinə töhfə verəcək. COP29 Azərbaycanda yeni innovativ texnologiyaların, yaşıl enerji həllərinin təqdimatı və iqlim böhranına qarşı birgə həllərin müzakirəsi üçün vacib bir platforma yaradacaq”, - deyə Şahmar Məmmədov əlavə edib.