TƏDBİRLƏR

Bir neçə həftə əvvəl Azərbaycanın həmişəki kimi yüksək səviyyədə təşkilatçılığı ilə tarixi COP29-a ev sahibliyi etdik. Ölkəmiz daim iqlim dəyişiklikləri ilə mübarizədə aktiv fəaliyyət sərgiləyib. İqlim problemləri ilə mübarizə çox vacib məsələdir. Burada təkcə dövlət deyil, həmçinin özəl sektor və cəmiyyətin birgə səyləri böyük rol oynayır.

Xeberler.az məlumat verir ki, bu barədə COP29-un İqlim dəyişmələri üzrə yüksəksəviyyəli çempionu Nigar Arpadarai Bakıda dekabrın 6-da "Femmes Digitales" İctimai Birliyinin təşkilatçılığı ilə həyata keçirilən dördüncü “Azərbaycan Qadınları İT-də Mükafatı (AWITA) 2024" mükafatlandırma mərasimində deyib.

"Bu gün burada həm özəl, həm də dövlət sektorunun nümayəndələrini bir arada görmək çox sevindiricidir. Çünki texnoloji sahədə də səyləri birləşdirmək vacibdir. Azərbaycanda qadınların hüquqlarının qorunması daim prioritet hesab edilib. Qadınların ölkəmizdə hər sahədə irəli getməsi dövlət siyasətinin bir parçasıdır. "Femmes Digitales" İB yaradılanda qadınların İKT sahəsində sayı daha az idi. Ölkəmizdə İT və texnologiyalarla məşğul olan qadınları bu platforma bir yerə toplayır.

Biz süni intellekt, texnoloji həllər, texnologiyaların sürətlə inkişaf etdiyi dövrdə yaşayırıq.

Buna görə biz qadınların bu sahədə daha da irəli getməsi və saylarının artması üçün dəstək göstərməliyik. Bu həm iqtisadi, həm sosial, həm də bərabərlik baxımından çox önəmlidir", - deyə Nigar Arpadarai əlavə edib.