KOSMOS

“Starlink” genişzolaqlı peyk internet xidməti Azərbaycanda istifadəyə verilib.

Xeberler.az məlumat verir ki, bu barədə “Starlink” şirkətinin “X” sosial şəbəkə hesabında paylaşım edilib.

Bildirilib ki, artıq Azərbaycanda “Starlink”in yüksəksürətli və aşağı gecikməli internet xidməti mövcuddur.

Qeyd edək ki, internet üçün standart “Starlink” modemi 670 AZN, mini modem 340 manat, qurğunun çatdırılması isə 50 AZN-dir. Paketin aylıq qiymətləri 80 və 100 manat təşkil edir. 50 GB-lıq internetin aylıq qiyməti 90 manat, limitsiz internetin qiyməti isə 170 manatdır.

Bildirək ki, sürət mini modemdə 50-100 Mbps, standart modemdə isə 100-250 Mbps-dir.

Bu xidmət mobil nömrə, optik xətt olmadan birbaşa peyk vasitəsilə internetə çıxışı təmin edir.

Qeyd edək ki, 2023-cü ildə Rəqəmsal İnkişaf və Nəqliyyat Nazirliyi yanında Kosmik Agentliklə ("Azərkosmos") “SpaceX” şirkəti (Space Exploration Technologies Corporation) arasında əməkdaşlıq müqaviləsi imzalanıb. Müqaviləyə ABŞ şirkətinin “Starlink” genişzolaqlı peyk internet xidmətinin Azərbaycanda təkrar satışını nəzərdə tuturdu.

Xatırladaq ki, “Starlink” amerikalı milyarder İlon Maskın “SpaceX” şirkəti tərəfindən hazırlanmış qlobal peyk şəbəkəsidir. Layihə dünyanın istənilən nöqtəsini yüksəksürətli genişzolaqlı internetlə təmin etmək məqsədi daşıyır. Peyk buraxılışları “SpaceX” raketləri ilə həyata keçirilir.

“Starlink” hazırda ABŞ, Kanada, Avstraliya, Avropanın əksər hissəsi, Latın Amerikası və Afrikanın bir sıra ölkələrində xidmət göstərir.