İlon Maska məxsus “SpaceX” şirkəti növbəti sınaq uçuşunun tarixini açıqlayıb. Meqaraketin yenilənmiş versiyasının sınaq uçuşu yerli vaxtla yanvarın 14-də saat 2-də planlaşdırılır və bu, raketin 7-ci uçuşudur.
Xeberler.az xarici mətbuata istinadən məlumat verir ki, uçuş zamanı ilk dəfə olaraq “Starship”dən faydalı yükün buraxılması planlaşdırılır. Belə ki, kosmik gəmi orbitə 10 eksperimental mini peyk çıxaracaq. Bu, sonradan “Starlink” peyklərinin daşınması üçündür. “Starlink” peykləri aşağı Yer orbitində yerləşdirilmiş, internet üçün istifadə olunan zəncirvari peyklər dəstidir və şirkət gələcəkdə onların sayını 40 minə çatdırmağı planlayır.
Təkrar istifadə üçün hazırlanmış bu konstruksiya iki hissədən ibarətdir – “Starship” kosmik gəmisi və “Super Heavy” daşıyıcısı. Ümumi hündürlüyü 123 metr olan konstruksiya “SpaceX”in inkişafı tarixində ən hündür raketdir, “Super Heavy” daşıyıcısı NASA-nın Ay missiyaları üçün hazırladığı SLS raketindən iki dəfə güclüdür.
“Starship” Yer ətrafında orbitini tamamladıqdan sonra və Avstraliyanın şimal-qərb sahillərində Hind okeanına düşəcək. “Super Heavy” daşıyıcısı isə uçuş meydançasına qayıtmalı və tutucu qollar vasitəsilə tutulmalıdır.
Raket daha əvvəl altı uçuş edib. Bu dəfə isə daşıyıcıda bir çox yeniliklər olunub və sistem optimallaşdırılıb. Dizayn təkmilləşdirmələri arasında ön sükan çarxlarının yeni tərtibatı da var ki, bu da onların qızmasını azaldır. Əvvəlki sınaqlar zamanı bu elementlər sona qədər öz funksiyalarını yerinə yetirmələrinə baxmayaraq, yenidən atmosferə daxil olduqda ciddi zədələnmişdi. Bundan əlavə, yeddinci uçuş üçün “Starship”in yanacaq tutumu 25 faiz artırılıb. Həmçinin avionika, kompüterlər, rabitə və enerji paylama sistemləri də tamamilə yenilənib. “Starship”in texnoloji imkanlarının hər dəfə yenilənməsi gələcəkdə Aya və Marsa missiyalara hazırlıqdır.
Uçuş Texas ştatının Boka-Çikada yerləşən Starbase platformasından həyata keçiriləcək. Şirkət uçuşu onlayn paylaşmağı planlaşdırır və canlı yayım uçuşdan təxminən 35 dəqiqə əvvəl başlayacaq.
