SÜNİ İNTELLEKT VƏ DATA

ChatGPT, Perplexity və digər məşhur süni intellekt (AI) əsaslı çatbotların verdiyi yanlış cavabların sayı son bir ildə demək olar ki, iki dəfə artıb.

Xeberler.az bildirir ki, NewsGuard tərəfindən aparılan bu araşdırma, süni intellekt modellərinin doğru məlumatı yanlış xəbərlərdən ayırd etməkdə hələ də çətinlik çəkdiyini göstərir.

Tədqiqatçılar 10 fərqli populyar çatbotu sınaqdan keçiriblər. Onlara bilərəkdən yanlış məlumatlar verilib və bu məlumatlar haqqında suallar soruşulub. Nəticələrə görə, 2024-cü ildən bəri yanlış cavabların ümumi nisbəti 18%-dən 35%-ə yüksəlib.

Pi (Inflection): Bu çatbot, sualların 57%-də yanlış məlumatları doğru kimi təqdim edib.

Perplexity: Bu AI axtarış sistemində yanlış cavabların nisbəti 0%-dan 47%-ə qalxıb.

ChatGPT: Yanlış cavabların nisbəti 33%-dən 40%-ə yüksəlib.

Grok: Bu göstərici 13%-dən 33%-ə çatıb.

Araşdırmaya görə, ən az yanlış məlumat verən çatbotlar Anthropic-in Claude (10%) və Google-un Gemini (17%) olub. Qeyd olunur ki, Claude-un yanlış cavablarının sayı 2024-cü ildən bəri artmayıb.

Tədqiqatçıların fikrincə, yanlış məlumatların artmasının əsas səbəbi çatbotların artıq heç bir məlumat tapa bilmədikdə belə cavab verməkdən imtina etməməsidir.