AZNET

“Hewlett-Packard” (HP) korporasiyasının keçmiş rəhbəri Mark Herd “Oracle”ın Direktorlar Şurasına qəbul edilib və şirkətin prezidenti vəzifəsinə təyin edilib. Lent.az-ın Rabitə və İnformasiya Texnologiyaları Nazirliyinin rəsmi saytına istinadən verdiyi məlumata görə, o, öz fəaliyyətinə dair “Oracle”ın baş icraçı direktoru Larri Ellisona hesabat verəcək. Xatırladaq ki, beş ildən artıq müddət ərzində HP-də fəaliyyət göstərən Mark Herd şirkətin prezidenti, baş icraçı direktoru və idarə heyətinin sədri vəzifələrində çalışıb. HP isə artıq keçmiş baş direktorunu məhkəməyə verib. Məhkəmədə irəli sürülmüş iddiada qeyd olunur ki, Mark Herdin rəqib şirkətə keçməsi ilə HP-nin kommersiya sirləri və son dərəcədə məxfi məlumatları təhlükə ilə üzləşir. İddiaçılar vurğulayırlar ki, Mark Herd şirkətin kommersiya sirlərinin, habelə onun HP-ı tərk edəcəyi təqdirdə belə qorunmasına görə “səhmlərlə və nağd pulla milyonlarla dollar” əldə edib. İddiada bildirilir ki, yeni iş yerində Mark Herd “Hewlett-Packard”ın sirlərini açıqlamasa, sadəcə olaraq fəaliyyət göstərə bilməyəcək. Bununla əlaqədar olaraq iddiaçılar məhkəmədən Mark Herdin “Oracle” şirkətinin prezidenti vəzifəsinə təyin olunmasının qarşının alınmasını tələb edirlər.