RƏQƏMSAL DÜNYA

  «Gənc Liderlər» Uşaq Təşkilatı(GLUT) 2009-cu il «Uşaq ili»ndə ilk əhəmiyyətli layihəsini reallaşdırıb. Bu barədə açıqlama verən təşkilatın sədri Fərid Şahbazlı GLUT-un Gənc İstedadların virtual Ensiklopediyasını hazırladığını bildirib. Onun sözlərinə görə, www.istedad.tk ünvanında fəaliyyət göstərəcək virtual Ensiklopediyada yaxın aylarda minlərlə gənc istedadlar haqqında məlumatlar yerləşdiriləcək.
  F.Şahbazlının sözlərinə görə, ölkəmizdə istedadlı uşaqların təbliği, fəaliyyət sferalarının genişləndirilməsi və onlar üçün yeni imkanların açılması məqsədi ilə yaradılan sayt bütün məktəblilərin görüş yerinə çevriləcək. Hazırlanan saytda müxtəlif sahələrdə-ictimai fəaliyyət, ədəbiyyat, musiqi, idmanda fərqlənən uşaq və yeniyetmələrin uğurları barədə materiallar yerləşdiriləcək. Təşkilat sədri deyir ki, daim yenilənəcək portal barədə isə bütün əlaqədar dövlət strukturlarına, ölkənin tanınmış ictimai xadimlərinə məlumat veriləcək ki, bu da gənc istedadların daha geniş miqyasda tanınmasına xidmət edir.   F.Şahbazlının sözlərinə görə, respublikamızda bu tip geniş miqyaslı layihə ilk dəfədir ki, həyata keçirilir və bu yaxın aylarda bütün ölkəni əhatə edəcək.
   GLUT sədrinin sözlərinə görə, Gənc İstedadlar Ensiklopediyasının digər maraqlı cəhəti isə burada məktəblilərin öz kumirləri, bəyəndikləri məmur, millət vəkili və media qurumu haqda məlumat vermələridir. Təşkilat bu işdə bütün ictimaiyyəti fəal olmağa çağırır.

xeberler.az/Ellada