İNNOVASİYA VƏ STARTAP

Ölkəmizin açıq innovasiya platforması olan “ASAN AI Hub” və “ASAN müraciət” informasiya sistemi arasında əməkdaşlıq çərçivəsində elan edilmiş süni intellekt həlli üzrə çağırışın qalibi müəyyən edilib.

Xeberler.az bildirir ki, Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin İctimaiyyətlə əlaqələr şöbəsindən verilən məlumata görə, “Vizual məzmunun intellektual analizi və uyğunluğunun avtomatik yoxlanılması" mövzusu üzrə çağırışın qalibləri "Zeka Lab" komandasından Ceyran MirQasım, Rəşad Cəfərov və Bibixanım Babayeva seçiliblər.

Çağırışlar çərçivəsində ümumilikdə 20 innovativ həll təqdim olunub. İlkin qiymətləndirmə mərhələsinin nəticələrinə əsasən, həll üzrə ən yüksək nəticə göstərən 4 komanda növbəti mərhələyə vəsiqə qazanıb.

Həmin təşəbbüs “ASAN müraciət” informasiya sisteminin süni intellekt əsaslı vizual analiz və avtomatik doğrulama imkanları ilə təkmilləşdirilməsinə yönəlib.

Yekun mərhələdə isə çağırış üzrə qalib komanda 5000 manat məbləğində mükafat ilə təltif olunub.

“ASAN AI Hub” platformasının əsas məqsədi Azərbaycanda süni intellekt sahəsində fəaliyyət göstərən tədqiqatçıları, dövlət qurumlarını, özəl sektoru və fərdi istifadəçiləri vahid rəqəmsal mühitdə bir araya gətirməkdir. Platforma açıq innovasiya modelini təşviq edərək dövlət, biznes və təhsil müəssisələri arasında effektiv əməkdaşlığı gücləndirir.

Platforma üzərindən real texnoloji problemlər açıq şəkildə elan olunur və tələbələr, universitet və elmi müəssisələrin nümayəndələri, sahibkarlar, eləcə də ictimai təşkilatlar həlləri ilə müraciət edərək mükafat fondu uğrunda rəqabət aparmaq imkanı əldə edirlər.