İNNOVASİYA VƏ STARTAP

Aqrar sahənin müxtəlif istiqamətləri və startap inkişafının müxtəlif mərhələləri üzrə fəaliyyət göstərən 30-a yaxın startapçı ilə məhsulların təkmilləşdirilməsi istiqamətində mütəmadi görüşlər keçirilir və müzakirələr aparılır. Nazirlik olaraq onların dəstəklənməsi daim diqqətimizdədir.

Xeberler.az  xəbər verir ki, bunu kənd təsərrüfatı naziri Məcnun Məmmədov Gəncədə keçirilən “Aqrar İnnovasiya və Startaplar Forumu”nda çıxışı zamanı söyləyib.

Nazir deyib: “Bugünkü Forumu aqrar startapçılarla müxtəlif yerli və xarici inkubasiya və akselerasiya mərkəzləri arasında əlaqələrin qurulması baxımından çox vacib hesab edirəm. Əminəm ki, Forumda iştirak edən 20-dən çox startapçı öz yenilikçi həllərini nümayiş etdirirərək, digər tələbələr arasında da bu sahəyə marağın artırılmasına töhfə verəcək. Belə tədbirlərin təşkili innovativ startap ideyalarının təbliği istiqamətində atılan önəmli addımlardan biridir”.

Məcnun Məmmədov startapçılara tövsiyələrini də çatdırıb: “Öz startapınızı qurarkən - su resurslarının səmərəli idarə olunması, fermerlərin bacarıqları ilə yanaşı, rəqəmsal kənd təsərrüfatı biliklərinin artırılması, ərzaq təhlükəsizliyinin təmin olunması, kənd təsərrüfatı məhsullarının istehsalında dayanıqlı və rəqabətyönümlü məhsulların istehsalı kimi prioritet məsələləri diqqətdə saxlamağınızı tövsiyə edirəm” (Azərtac)