SÜNİ İNTELLEKT VƏ DATA

Şamaxı rayonunda keçirilən Üzüm və Şərab Festivalı çərçivəsində Kənd Təsərrüfatı Nazirliyinin Aqrar İnnovasiya Mərkəzi və Şamaxı Rayon İcra Hakimiyyətinin birgə təşkilatçılığı ilə “Dəqiq kənd təsərrüfatında süni intellektin tətbiqi” layihəsinə həsr olunmuş növbəti “Bootcamp” baş tutub.

Xeberler.az bildirir ki, “Bootcamp”ın əsas məqsədi kənd təsərrüfatında rəqəmsal texnologiyaların tətbiqini təşviq etmək, gənclərin nəzəri biliklərini praktik bacarıqlara çevirməsinə şərait yaratmaq, həmçinin aqrar sahədə startap ekosisteminin inkişafına dəstək olmaqdır.

Avqustun 12-13-də Dövlət Vergi Xidmətinin Tədris Mərkəzində baş tutan “Bootcamp”da ölkəmizin 17 ali təhsil müəssisəsində “Aqronomluq”, “Data analitikası”, “Elektronika” və “Kompüter mühəndisliyi” ixtisasları üzrə təhsil alan 20 tələbə iştirak edib.

Proqram çərçivəsində aqrar sahədə ixtisaslaşmış şirkətlərin, eyni zamanda, 10-dan artıq akselerasiya və inkubasiya mərkəzlərinin mütəxəssisləri tərəfindən təqdimatlar həyata keçirilib. Təqdimatlar zamanı mütəxəssislər iştirakçıların təqdim etdikləri layihələrinin daha da təkmilləşdirilməsi, istehsalatda tətbiq olunma imkanları, kommersiyalaşdırılması və bazara çıxarılması ilə bağlı öz təcrübə və tövsiyələrini bölüşüblər.

“Bootcamp” iştirakçıları biotexnoloji üsullarla istehsal edilmiş bitkilərin satışını təşkil edən vahid platforma, suvarma şəbəkələrinin avtomatlaşdırılması, sensor texnologiyaları, aqrar fəaliyyətlərin ağıllı idarəedilməsi üzrə proqram təminatı, su hövzələrində və akvariumda toplanan balıq atqılarını filtrdən keçirməklə təbii, saf və maddi sərfəli gübrənin alınmasına yönəltmək, heyvandarlıqda “Concox Qbit-4G” modulu əsasında yerli GPS izləmə sistemi, propandiol molekulunun bioloji fermentasiya ilə ekoloji təmiz mühitdə alınması, bitki xəstəliklərinin foto əsasında müəyyən olunmasına köməklik göstərən applikasiya və digər innovativ ideya və modellərlə bağlı təqdimatlar ediblər.

“Bootcamp” çərçivəsində Azərbaycan Respublikasının kənd təsərrüfatı naziri Məcnun Məmmədov və Şamaxı Rayon İcra Hakimiyyətinin başçısı Tahir Məmmədovun tələbələrlə görüşü keçirilib.

Görüşdə çıxış edən nazir Məcnun Məmmədov bildirib ki, bütün sahələrdə olduğu kimi, kənd təsərrüfatında da müasir, süni intellekt əsaslı texnologiyaların tətbiqi bu sahənin inkişafını təmin edən əsas amillərdən birinə çevrilib. Gənclərin aqrar sahədə tətbiqi üçün nəzərdə tutulmuş startap layihələrinin nazirlik tərəfindən hər zaman dəstəkləndiyini bildirən nazir “Bootcamp” iştirakçılarına uğurlar arzulayıb.

Şamaxı Rayon İcra Hakimiyyətinin başçısı Tahir Məmmədov bildirib ki, 4-cü dəfə keçirilən Üzüm və Şərab Festivalı bölgənin aqrar və turizm potensialından səmərəli istifadə üçün mühüm platformaya çevrilib. Bu festival çərçivəsində təşkil olunan məlumatlandırma sessiyalarının, aqrar sahəyə dair panel müzakirələrin tədbirə rəng qatdığını deyən Tahir Məmmədov gənc startapçıların irəli sürdüyü təşəbbüs və layihələrin aqrar sahədə davam edən dinamik inkişafın mühüm dəstəkverici elementinə çevriləcəyinə əmin olduğunu ifadə edib.

Aqrar İnnovasiya Mərkəzinin direktoru Anar Cəfərov Zəngilan və Xaçmazdan sonra üçüncü “Bootcamp”ın Şamaxı rayonunda keçirildiyini bildirib, bu layihənin gənclərin aqrar sahəyə marağının artırılması, layihə və təşəbbüslərin dəstəklənməsi, yeni startapların hazırlanması baxımından mühüm əhəmiyyət kəsb etdiyini bildirib. Ötən “Bootcamp”larda təqdim olunan layihələrdən bəzilərinin real tətbiqinə başlandığını deyən AİM rəhbəri bu tədbirdə təqdim olunan uğurlu təşəbbüs və modellərin də analoji uğurlara imza atacağına inandığını deyib.

Daha sonra “Bootcamp” iştirakçıları müəllifləri olduqları layihələrlə bağlı təqdimatlar ediblər. Aqrar sahəyə dair irəli sürülən təşəbbüslər ətrafında geniş müzakirələr aparılıb, yeni çağırışlara uyğun startap layihələrinin, təqdim olunan modellərin daha da təkmilləşdirilməsi istiqamətində tələbələrə tövsiyələr verilib.

“Bootcamp” iştirakçılarının aqrar sahəyə dair bilik və təcrübəsini zənginləşdirmək məqsədilə Şamaxı rayonunda aqrar sahə üzrə ixtisaslaşmış istehsalat müəssisələrinə infotur təşkil olunub. İştirakçılar “Az-Granata” MMC-nin təsərrüfatında, Üzümçülük və Şərabçılıq Elmi-Tədqiqat İnstitutunun təcrübə təsərrüfatında, “Şirvan Şərabları” MMC-nin istehsalat sahəsində real iş prosesi ilə yaxından tanış olmaq imkanı qazanıblar. Bu səfərlər tələbələrin aqrar sektorda innovativ texnologiyaların tətbiqi imkanlarını daha dərindən öyrənməsinə şərait yaradıb.

Daha sonra “Bootcamp” iştirakçıları “IV Üzüm və Şərab Festivalı”nda yaradılan startap zonada təmsil olunaraq öz məhsul və prototiplərini ziyarətçilərə təqdim ediblər. Festivalda iştirak tələbələrə öz layihələrini geniş auditoriyaya tanıtmaq imkanı verib.