NƏQLİYYAT

Azərbaycanda Beynəlxalq Nəqliyyat Forumu ilə əməkdaşlığa həsr olunan məlumat sessiyası keçirilib

Xeberler.az bildirir ki, Rəqəmsal İnkişaf və Nəqliyyat Nazirliyi, aidiyyəti tənzimləyici qurumlar və dövlət müəssisələrinin nümayəndələrinin iştirakı ilə Azərbaycan ilə Beynəlxalq Nəqliyyat Forumu (BNF) arasında əməkdaşlığa həsr olunan məlumat sessiyası təşkil olunub.

Tədbirdə çıxış edən Nazirliyin Nəqliyyat siyasəti şöbəsinin müdiri Fariz Əliyev bildirib ki, Azərbaycanın 2025–2026-cı illər üzrə BNF-yə sədrliyi ölkənin qlobal nəqliyyat siyasətinə aktiv töhfə verdiyini nümayiş etdirir. Onun sözlərinə görə, BNF ilə əməkdaşlıq çərçivəsində Azərbaycan həm beynəlxalq təcrübə və analitik alətlərdən faydalanır, həm də rəqəmsallaşma, nəqliyyatın idarə olunması və infrastrukturun inkişafı sahəsində öz təcrübəsini bölüşür.

BNF-nin İnstitusional əlaqələr və sammit üzrə rəhbəri Mary Crass isə qeyd edib ki, Azərbaycan yalnız iştirakçı kimi deyil, həm də təşəbbüskar və lider tərəfdaş kimi nümunəvi mövqe nümayiş etdirir. O vurğulayıb ki, sədrliyin prioritetləri artıq konkret addımlara və real nəticələrə çevrilməkdədir.

Sessiya çərçivəsində Beynəlxalq Nəqliyyat Forumunun fəaliyyət istiqamətləri və əməkdaşlıq imkanları barədə geniş məlumat verilib. Həmçinin Azərbaycanın aidiyyəti qurumlarının BNF-nin tədqiqat layihələrinə qoşulması, məlumat və təcrübə mübadiləsi, eləcə də ekspert müzakirələrində iştirakı kimi konkret əməkdaşlıq istiqamətləri diqqətə çatdırılıb.

Tədbirdə Azərbaycanın sədrliyi dövründə formalaşmış müsbət dinamikanın qorunmasının və milli qurumlar arasında koordinasiyanın daha da gücləndirilməsinin vacibliyi də qeyd olunub.