NƏQLİYYAT

Azərbaycan Yunanıstanın Patras şəhərində Balkan və Qara Dəniz regionlarının nəqliyyat bağlantılarına həsr olunan beynəlxalq konfransda təmsil olunub.

Xeberler.az məlumat verir ki, İqtisadi Əməkdaşlıq və İnkişaf Təşkilatı (OECD) nəzdində fəaliyyət göstərən Beynəlxalq Nəqliyyat Forumu (BNF) çərçivəsində keçirilən tədbirdə Rəqəmsal İnkişaf və Nəqliyyat Nazirliyinin BNF-yə ezam olunmuş nümayəndəsi, analitik Əliş İsmayılov çıxış edib.

Çıxışı zamanı o bildirib ki, son illərdə qlobal təchizat zəncirləri ciddi sınaqlarla üzləşib və Avropa ilə Asiya arasında alternativ, dayanıqlı nəqliyyat marşrutlarının əhəmiyyəti daha da artıb. Bu kontekstdə Orta Dəhliz Avropa və Asiyanı birləşdirən strateji, iqtisadi baxımdan səmərəli və dayanıqlı nəqliyyat xətti kimi formalaşır.

Əliş İsmayılov qeyd edib ki, beynəlxalq nəqliyyat bağlantılarının gücləndirilməsi Azərbaycanın 2025–2026-cı illərdə Beynəlxalq Nəqliyyat Forumuna sədrliyi dövründə əsas prioritetlərdən biri olub. Onun sözlərinə görə, Orta Dəhlizlə bağlı mövzu təşkilatın gündəliyində xüsusi yer tutur və bu istiqamətdə müzakirələrin gələcəkdə də davam etdirilməsi nəzərdə tutulur.

Çıxışda OECD və BNF tərəfindən hazırlanan “Orta Dəhlizin potensialının reallaşdırılması” adlı hesabatına da istinad edilib. Sənəddə regional iqtisadi inteqrasiyanın gücləndirilməsi, sərhəd və tranzit prosedurlarının sadələşdirilməsi, liman və dəmir yolu infrastrukturuna investisiyaların artırılması, həmçinin dövlət və özəl sektor əməkdaşlığının genişləndirilməsi əsas prioritetlər kimi göstərilir.

Sonda BNF-nin 2026–2027-ci illər üzrə İş Proqramında yükdaşımaların səmərəliliyi və rəqəmsallaşdırılması istiqamətində yeni tədqiqatların aparılmasının nəzərdə tutulduğu bildirilib və üzv dövlətlər əməkdaşlığa dəvət olunub.