KOSMOS

Azərbaycanda ilk dəfə 7-9-cu siniflərdən seçilmiş 600 məktəblini bir araya gətirən Beynəlxalq Kosmik Olimpiadanın milli mərhələsi keçiriləcək.

Xeberler.az məlumat verir ki, Azərkosmosun KOSMİK Akademiyasının təşkilatçılığı, Azərbaycan Respublikası Təhsil İnstitutunun və Məktəbəqədər və Ümumi Təhsil üzrə Dövlət Agentliyi, STEAM Azərbaycanın dəstəyi ilə baş tutacaq.

İnteraktiv metoda əsaslanan olimpiada mərhələlərini keçən məktəblilər 7 ay müddətində kosmosla əlaqədar olan kəşflər və texnologiyalar istiqamətində “yaşıl dünyada kosmik həllər”, “5-ci nəsil texnologiya inqilabı və kosmos”, “Süni intellekt”, “kosmik innovasiyalar”, “kosmos və cəmiyyət” mövzuları istiqamətində planetimiz üçün problemlərin orijinal həllərini tapmaqla əvəzolunmaz təcrübə qazanacaqlar. İnteraktiv metod imkan verəcək ki məktəblilər bilikləri hazır şəkildə deyil, bu bilikləri daha çox özləri birlikdə axtarıb taparaq ortaya həll qoysunlar.

2024-2025-ci illəri əhatə edən bu olimpiada müddətində məktəbliləri milli komandalardan ibarət onlara bələdçilik edəcək fasilitator müəllimlər olacaq. Həmin müəllimlər üçün Beynəlxalq Kosmik Olimpiadasının təşkilat komitəsinin üzvləri tərəfindən iki günlük “Təlimçilərin Təlimi” proqramı həyata keçirilmişdir. Təlimlər olimpiadanın müxtəlif mərhələləri və prosesləri haqqında müəllimlərə məlumat vermək, onların gözləntiləri və təlimatları aydın şəkildə başa düşməsini təmin etmək məqsədini daşıyır. İki gün müddətində həyata keçirilmiş təlimlərdə ümumtəhsil müəssisələrinin STEAM əsaslı tədrisi aparan 70 müəllimi iştirak edərək sertifikatlarla təltif olundular. Təlimlər zamanı müəllimlərə kosmos təhsilinin yenilikləri, imkanları və təhsil innovasiyaları ilə əlaqədar nümunələr əsasında praktiki sessiyalar təqdim edildi. Təlim proqramında iştirakçılara layihə idarə olunması istiqaməti üzrə metodlar və bir çox rəqəmsal alətlər yer alımışdır.

Beynəlxalq Kosmik Olimpiada proqramında fasilitator müəllimlərin rolu məktəblilərin özünü idarə edən öyrənmə prosesini asanlaşdırmaq və istiqamətləndirmək, o cümlədən məktəblilərə özünü tənzimləmə bacarıqlarını, effektiv komanda işi və birgə problemlərin həlli strategiyalarını inkişaf etdirməyə kömək etməkdir. Fasilitator müəllimlər məktəbli komandalarına dəstək göstərir, rəy və bələdçilik edir, maraq, tənqidi düşünmə və gələcək uğur üçün vacib olan STEAM bacarıqlarının inkişafını təşviq edən mühiti inkişaf etdirir.

ilk dəfə 2000-ci ildə həyata keçirilmiş Beynəlxalq Kosmik Olimpiada dünyada kosmik sahə üzrə ən nüfuzlu məktəbli tədbirlərdən hesab olunur və 3 əsas pedaqoji yanaşma (idarəedilən kəşf və öyrənmə, problem əsaslı tədris, hesablama təfəkkürü) vasitəsilə məktəblilərin bacarıqlarını inkişaf etdirir.