RƏQƏMSAL DÜNYA

Prezident İlham Əliyev kibertəhlükəsizlik və fərdi məlumatların mühafizəsi sahəsində idarəetmə, tənzimləmə və nəzarət mexanizmlərinin təkmilləşdirilməsi ilə bağlı Fərman imzalayıb.

Xeberler.az məlumat verir ki, fərmana əsasən, Rəqəmsal İnkişaf və Nəqliyyat Nazirliyi yanında fəaliyyət göstərən Elektron Təhlükəsizlik Xidmətinin bazasında Nazirliyin tabeliyində “Milli Kibertəhlükəsizlik Agentliyi” publik hüquqi şəxs yaradılıb.

Yeni Agentlik ölkədə kibertəhlükəsizlik sahəsində tənzimləmə və nəzarətin həyata keçirilməsi, informasiya infrastrukturlarının dayanıqlılığının artırılması, kibertəhlükələrin aşkarlanması və qarşısının alınması, əhalinin və qurumların kibertəhlükəsizlik sahəsində maarifləndirilməsi, metodiki dəstəyin göstərilməsi, eləcə də fərdi məlumatların mühafizəsi istiqamətində fəaliyyət göstərəcək.

Sənədə əsasən, Agentlik Elektron Təhlükəsizlik Xidmətinin hüquqi varisi hesab olunur. Xidmətin bütün hüquq və öhdəlikləri, eləcə də əmlakı yeni quruma ötürüləcək.

Milli Kibertəhlükəsizlik Agentliyinin fəaliyyətinə rəhbərlik etmək üçün sədr və onun üç müavinindən ibarət İdarə Heyəti yaradılacaq. Agentliyin nizamnaməsi də dövlət başçısı tərəfindən təsdiqlənib.

Fərmanda qeyd olunur ki, Agentlik ölkə üzrə mövcud və potensial kibertəhlükələr barədə məlumatlandırma işini həyata keçirəcək, telekommunikasiya operatorları və internet provayderləri ilə birlikdə qlobal kiberhücumların qarşısının alınması istiqamətində qabaqlayıcı tədbirlər görəcək. Həmçinin informasiya infrastrukturu subyektləri arasında koordinasiyanın təmin edilməsində iştirak edəcək.

Bununla yanaşı, Agentliyə internet informasiya ehtiyatlarında yayılması qadağan edilən məlumatlarla bağlı tədbirlərin görülməsi və fərdi məlumatların mühafizəsi sahəsində fəaliyyətin həyata keçirilməsi səlahiyyətləri də verilib.

Nazirlər Kabinetinə Agentliyin dövlət qeydiyyatına alındığı gündən etibarən bir ay müddətində Elektron Təhlükəsizlik Xidmətinin balansında olan əmlakın yeni qurumun balansına verilməsini təmin etmək tapşırılıb. Rəqəmsal İnkişaf və Nəqliyyat Nazirliyi isə Agentliyin dövlət qeydiyyatına alınması üçün zəruri tədbirlər görəcək.

Fərmanla həmçinin bir sıra normativ hüquqi aktlara dəyişiklik edilib, müxtəlif sənədlərdə “Elektron Təhlükəsizlik Xidməti” ifadəsi “Milli Kibertəhlükəsizlik Agentliyi” ilə əvəz olunub. Bununla əlaqədar olaraq, 2013-cü ildə Elektron Təhlükəsizlik Xidmətinin fəaliyyətinin təmin edilməsi haqqında imzalanmış fərman da ləğv edilib.

Yeni qurumun yaradılması ölkədə kibertəhlükəsizlik sisteminin institusional əsaslarının gücləndirilməsi, rəqəmsal infrastrukturun təhlükəsizliyinin artırılması və dövlət nəzarətinin daha səmərəli təşkilinə xidmət edəcək.