RƏQƏMSAL DÜNYA

Bu ilin mart ayında Azərbaycanın mobil rabitə operatorlarının şəbəkələrində giriş internet trafikinin sürəti 35,50 Mbit/s təşkil edib.

Xeberler.az-ın "Ookla"nın "Speedtest Global Index"in məlumatları əsasında apardığı hesablamalara görə, bu göstərici fevral ayı ilə müqayisədə 0,9% artıb.

Cari ilin martında ölkənin mobil şəbəkələrində çıxış trafikinin sürəti fevral ayının göstəricisi ilə müqayisədə 5,1 azalaraq 15,10 Mbit/s olub.

Qeyd edək ki, dünya üzrə giriş və çıxış mobil trafikinin sürəti isə müvafiq olaraq 48,40 Mbit/s və 12,60 Mbit/s təşkil edib.

Mart ayının nəticələrinə görə, Azərbaycan bu göstərici üzrə 140 ölkə arasında 1 pillə geriləyərək 64-ci yerdə qərarlaşıb.

Mobil internet sürətinə görə, liderlərin ilk üçlüyünə BƏƏ (178,52 Mbit/s), Cənubi Koreya (170,52 Mbit/s) və Qətər (167,40 Mbit/s) daxil olub.

Reytinqə əsasən, bu ilin mart ayında Azərbaycanda stasionar genişzolaqlı internet trafikinin giriş sürəti 22,74 Mbit/s, çıxış sürəti isə 24,73 Mbit/s təşkil edib. Bu göstəricilər ötən ilin fevral ayı ilə müqayisədə müvafiq olaraq 2,9 və 3,3% azalıb.

Mart ayının nəticələrinə görə, sabit internetin sürəti reytinqində Azərbaycan 177 ölkə arasında 1 pillə geriləyərək 120-ci yerdə qərarlaşıb.

Dünyada ən sürətli sabit interneti olan ilk üç lider ölkəsi Sinqapur (234,40 Mbit/s), Tailand (230,59 Mbit/s) və Honkonq (224,73 Mbit/s) olub. Sabit internetin giriş və çıxış trafikinin qlobal orta sürəti isə müvafiq olaraq 98,67 Mbit/s və 53,22 Mbit/s olub.