İNTERNET

Azərbaycanda SMS və danışılmış dəqiqələr ilbəil azalaraq öz yerlərini internetə verirlər.

Xeberler.az məlumat verir ki, ölkədaxili mobil telefon trafiki 2020-ci ildə 18 milyard 725,6 milyon dəqiqə olduğu halda, 2024-cü ildə 13 milyard 729,0 milyon dəqiqəyə düşüb. Bu, ötən dövr ərzində təxminən 26,7% azalmanı göstərir.

Mobil şəbəkədaxili çıxış trafiki də azalmaqda davam edir. 2020-ci ildə 14 milyard 614,4 milyon dəqiqə olan bu göstərici 2024-cü ildə 9 milyard  944,6 milyon dəqiqəyə enib. Digər mobil şəbəkələrə çıxış trafiki də azalma tendensiyası göstərir. 2020-ci ildə 3 milyard 574,4 milyon dəqiqə, 2024-cü ildə isə 3 milyard 440,2 milyon dəqiqə.

Göndərilmiş SMS-lərin sayı ciddi şəkildə azalıb. 2020-ci ildə 303,3 milyon ədəd olan SMS sayı 2024-cü ildə 132,1 milyon ədədə düşüb. Bu, ölkə daxilində SMS istifadəsinin yarıdan çox azalmasıdır.

Cəmi beynəlxalq giriş trafiki 2020-ci ildə 41,2 milyon dəqiqə ikən, 2024-cü ildə 26,1 milyon dəqiqəyə geriləyib. Cəmi beynəlxalq çıxış trafiki isə 28,3 milyon dəqiqədən 11,0 milyon dəqiqəyə enib.

İnternet tərəfdə mənzərə fərqli istiqamətdədir. Ölkədə mobil və sabit internet istifadəçilərinin sayı isə artmaqda davam edir. Aktiv mobil genişzolaqlı (GPON) internet abunəçilərinin sayı 2020-ci ildə 6.3 milyon nəfərdən 2024-cü ildə 9.2 milyon nəfərə yüksəlib.

Əhalinin hər 100 nəfərinə düşən mobil internet abunəçilərinin sayı 63.4-dən 90.4-ə çatıb.

Sabit genişzolaqlı internet abunəçilərinin sayı 2020-ci ildə 1,16 milyon nəfər ikən, 2024-cü ildə 2,32 milyon nəfərə yüksəlib. Xüsusilə yüksək sürətli (100 Mbit/s və yuxarı) abunəçilərin sayı 23,4 mindən 1 milyon 094,3 min nəfərə qədər artıb.

Əlavə olaraq ölkədə beynəlxalq internet kanalı da sürətlə genişlənib. Dövlət Statistika Komitəsinin (DSK) açıqlamasında 2020-ci ildə bir istifadəçi üçün orta kanal həcmi 181,5 kbit/s idisə, 2024-cü ildə 863,1 kbit/s-ə çatıb.