TELEKOMMUNİKASİYA

Cenevrə şəhərində Beynəlxalq Telekommunikasiya İttifaqı (BTİ) Şurasının iclası keçirilir. Tədbirdə Azərbaycan rəqəmsal inkişaf və nəqliyyat nazirinin müavini Saməddin Əsədovun rəhbərlik etdiyi nümayəndə heyəti ilə təmsil olunur.

Xeberler.az bildirir ki, iclasda Bakıda keçirilmiş Ümumdünya Telekommunikasiyanın İnkişafı Konfransının (WTDC-25) hesabatı, bu il təşkil olunacaq BTİ-nin Səlahiyyətli Konfransına, həmçinin 2027-ci ildə nəzərdə tutulan Ümumdünya Radiorabitə Konfransına və Radiorabitə Assambleyasına hazırlıq məsələləri müzakirə edilib. Eyni zamanda, 2028–2031-ci illər üzrə Strateji və Maliyyə Planı da diqqət mərkəzində olub.

Məlumat üçün bildirilib ki, Azərbaycanın BTİ Şurasına 2027–2030-cu illər üzrə, eləcə də Azərkosmos nümayəndəsinin Radio Tənzimləmə Komitəsinə üzvlük üçün namizədliyi təqdim olunub.

İclas çərçivəsində Saməddin Əsədov BTİ-nin baş katibi Dorin Boqdan Martin ilə görüşüb. Görüşdə Azərbaycanda rəqəmsal inkişaf istiqamətində görülən işlər barədə məlumat verilib, əməkdaşlığın genişləndirilməsi imkanları müzakirə olunub.

Nazir müavini, həmçinin Türkiyənin nəqliyyat və infrastruktur nazirinin müavini Ömər Fatih Sayan, Qazaxıstanın süni intellekt və rəqəmsal inkişaf nazirinin müavini Dosjan Musaliyev və Çinin sənaye və informasiya texnologiyaları nazirinin müavini Xiong Jijun ilə də ikitərəfli görüşlər keçirib.

Qeyd edilib ki, bu görüşlər Azərbaycanın rəqəmsal inkişaf sahəsində mövqeyinin beynəlxalq səviyyədə təqdim olunması, süni intellekt və innovasiya sahələrində təcrübə mübadiləsinin genişləndirilməsi, həmçinin yeni əməkdaşlıq imkanlarının formalaşdırılması baxımından mühüm əhəmiyyət daşıyır.

Bundan əvvəl isə BTİ Şurasının iclası öncəsi nazirlərin qeyri-rəsmi görüşü keçirilib. Görüşdə yeni texnologiyaların tətbiqi, özəl sektorun iştirakının artırılması, maliyyələşmə modelinin təkmilləşdirilməsi və BMT ilə əməkdaşlıq məsələləri müzakirə olunub.