KRİPTOVALYUTA

Azərbaycan kripto adaptasiyası üzrə qlobal reytinqdə 151 ölkə arasında 90-cı yerdə qərarlaşıb.

Xeberler.az məlumat verir ki, bu barədə “Chainalysis” şirkətinin hesabatında bildirilib.

Qlobal kriptovalyuta reytinqinə görə Azərbaycan Salvador (89) və İrlandiya (91) arasında qərarlaşıb.

Hesabata əsasən, Azərbaycan adi fərdi istifadəçilərin mərkəzləşdirilmiş platformalarda (məsələn, Binance, Coinbase və s.) apardıqları kripto əməliyyat həcminə görə orta aktivlik səviyyəsinə malikdir və bu göstərici üzrə 83-cü olub. Kriptovalyuta üzrə ümumi tranzaksiya dəyərinə görə ölkə mərkəzləşdirilmiş kripto bazarda orta səviyyəli oyunçu kimi qiymətləndirilir və 81-ci olub. Mərkəzləşdirilməmiş maliyyə (məsələn, Uniswap, Aave, Curve) sektorunda Azərbaycanın kripto üzrə göstəriciləri (97-ci yer) zəif olub. Bu, texnoloji biliklər və hüquqi infrastrukturun inkişaf səviyyəsi ilə əlaqələndirilir.

Ölkə iri investorlar və şirkətlərin kripto əməliyyatlarının həcminə görə 82-ci yerdə qərarlaşıb. Bu isə o deməkdir ki, kripto bazarında şirkətlərin, fondların və ya iri investorların mərkəzləşdirilmiş platformalarda etdiyi əməliyyatların həcmi azdır. Yəni, ölkədə əsasən fərdi istifadəçilər aktivdir, amma böyük maliyyə institutları hələ kütləvi şəkildə daxil olmayıb.

Ümumi nəticələr göstərir ki, Azərbaycan kriptovalyuta bazarına tədricən daxil olma mərhələsindədir. Ölkədə fərdi istifadəçilər tərəfindən kripto əməliyyatları müəyyən fəallıqla aparılır, lakin mərkəzləşdirilməmiş maliyyə və institusional seqmentlərdə inkişaf potensialı yüksək olaraq qalır.

Qeyd edək ki, hesabatda Hindistan, ABŞ və Pakistan kripto adaptasiyası üzrə ilk üç yeri bölüşüb.